Vawiin khan Serchhip District Bawrhsap Dr. Lalrozama, IAS hovin a pisa ah Serchhip Field Veng a Auditorium sak mek leh Hmar Veng a Mini-Sports Complex sak mek chungchang sawiho a ni a, UD&PA Director Pu Zorammuana pawh Aizawl atangin a rawn tel a, Serchhip District Superintendent Pu Lalringdika, MPS bakah Power & Electricity Department, PHE Department, PWD, I&PR, UD&PA officials te bakah Sub-Headquarters YMA Serchhip aiawh te, MJA aiawhte leh he Project khawihtu Contractor NBCC aiawhte an tel a ni.

Dr. Lalrozama chuan Auditorium leh mini-Sports Complex sak mek te chu an zo dawn hnai tawh ang a a lan avangin duhthusam lo lai te an zawhfel hnu a sawisel hian awmzia a nei thui tawh thin lova, chuvang chuan a nihna ang tur taka sak zawh anih theih nan ngaihdan leh duhdan te sawiho tul tihna avang leh an hnathawh te uluk taka vil zui zel anih dan tur te sawiho a tul vanga inhmukhawm an nih thu a sawi a, heng hnathawh te hi zawhfel anih hnu ah sawrkar atang enkawl chhunzawmna tur sum a awm dawn dawn loh avanga a enkawl zui dan tur ngaihtuah a tul thu te a sawi a ni.

Pu Zorammuana, UD&PA Director pawhin Auditorium leh mini-sports complex te sak chhunzawmna tur last instalment Rs 5 crore pawh Mizoram sawrkar kuta a awm tawh thu leh NBCC te kuta hlan chhawn theih reng anih tawh thu sawiin hun tiam chhunga heng hna te zawhfel anih theihlohna chhan te a sawifiah a, contractor hmasa BGM Consultant te hnathawh dan duhkhawp lohna vangin NBCC ten an la chhawnga, harsatna a awm chhoh neuh neuh vangin duh angin hna a kal chak ta lo ani tiin a hmawr an bawk hnai ta chu thil lawmawm tak a ni a ti bawk.

Heng hna te hi thawh zawhfel anih hnu a enkawl zui dan tur sawiho anih hnu ah UD&PA Department in ruahmanna an duang chhin ang a, chumi chu District Bawrhsap hova committee in a lo ngaihtuah ho tura chhawpchhuah phawt anih hnu ah hmalak dan tur sawiho zel a, hna thawh zawh fel hma a ruahmanna mumal tak siam hman tum a ni.

Bawrhsap pisa a thutkhawm anih hnu hian Auditorium leh mini-sports complex te chu a hmunah enho nghal a ni a, NBCC hotute sawi dan in a sak hna hi Agni Shanti Company Ltd., Guwahati ten an thawk a, Auditorium chu a chhung hna an zawhfel thawkhat tawh thu leh pawnlam hna khawih ngaite pawh an zawhfel thuai tur thu te, March ni 31, 2016 hma a zawhfel vek an tum thu an lo sawi a, mini-sports complex pawh chak taka an thawh reng thu leh kumin June thla chhung ngei a zawhfel vek an tum thu an sawi bawk a ni. mini-sports complex ah hian phul lem (artificial grass) phah a ni ang.

Serchhip Auditorium hi mi 1000 leng tura ruahman niin mini-sports complex hi entu mi 5000 leng tura ruahman a ni a, auditorium leh mini-sports complex hi project pakhat hnuaia sak an ni a, project cost hi Rs 34 crore a ni.