Vawiin khan Art & Culture Minister Pu R.Romawia hovin a pisaah Chapchar Kut Organising Committee chuan kumin Chapchar Kut hman dan tur an rel.

Meeting-ah hian kumin March ni 6 ah Chapchar Kut chu Aizawl Sipai Lammualah hman tum leh ni se, Kut Pa atan Mizoram Chief Minister leh Kut thlengtu atan chuan Art & Culture Minister Pu R.Romawia beisei ni se, an ti. Chapchar Kut denchhen hian Painting leh Photo Exhibition bakah Flower Fair cum Sale neih tum a ni a. Kut hman dan tur chipchiar duang tur hian Art & Culture Director Chairman-na hnuaiah Programme Sub-committee din a ni bawk.

Chapchar Kut Organising Committee chuan hlim leh thianghlim taka he Kut hi hman a nih theih nan zu leh ruihhlo chunghchangah khauh lehzual a hmalak tha a ti a. Lammuala a lawmna pui ber chhim ve remchanglo te pawhin hemi ni hi chuan mahni awmhmun leh hnathawhna hmunah te Mizo hnam incheina kan neih ang angte inbel turin Organising Committee chuan mipuite a ngen a ni.