Food Civil Supplies & Consumer Affairs Minister leh Mamit bialtu MLA ni bawk Pu John Rotluangliana chuan nimin khan Nghalchawm a vantlang hall(Community Hall) sak thar chu a khaw mipuiten tangkai taka an hman atan a hawng. Minister hi Chairperson, Women Commission leh Hrangturzo bialtu MLA ni bawk Pi Vanlalawmpuii Chawngthu in a tawiawm a ni.

Hall hawnna inkhawm ah thusawiin Pu John Rotluangliana chuan vantlang hall te hi sak leh repair a har a chuvangin a khua miten an ta a ni tih hriaa duata taka an enkawl a ngai a tiin neitu rilru pua hall thar hi enkawl turin khaw mipuite a chah a. Khawtlang nen thawhhona a that chuan hmasawnna hi mipui zawng zawng hnenah a thleng thei a chuvangin lungrual taka Sawrkar nen kan tan hoa kan thawhho a pawimawh a ni, a ti.

Supply Minister Pu John Rotluangliana chuan buhfai man tunhnaia tlema tihsan chungchang sawiin mirethei leh mi harsa zawk ten buhfai tam zawk an dawn thei nan Sawrkar chuan huaisen takin MLA, ex-MLA, District Council-a ex- MDC leh MDC te quota chu a titawp a, pawl leh Kohhran te tana special quota a pek thin te pawh a ti tawp a. BPL leh AAY te tan buhfai man a to lova anni hian a hmaa man tlawma buhfai an leina thin angin an lei reng dawn a, a man to kg 1 cheng 15 a lei tur chu mirethei chung lam APL card neite chauh an ni, a ti. Hemi avang hian Sawrkar chuan thla tin sum cheng vaibelchhe 4.40 vel a hum thei dawn a, hei hi mipuiten Mizoram tana an thawhchhuah a ni thei dawn a ni, a ti.

Sawrkar chuan hmeichhia te dinhmun a ngaituahin chawikan a tum a chuvangin tunhnai khan Village Council-a hmeichhia te seat hausakna dan te a passed a, hei hi thil ropui tak a ni a tiin hmeichhia te chu hemi atana in puahchah turin a fuih.

Pi Vanlalawmpuii Chawngthu chuan hmeichhia te chan che thin tunhnaia Sawrkarin dan thar pahnih – Village Council-a hmeichhia te seat hauhsakna leh hmeichhia ten ro an khawm theihna dan te hian hmeichhia te dinhmun nasa taka a chawikan a beisei thusawiin hmeichhia te tan kawl a eng tan dawn a ni a ti. Hall hawnna inkhawm hi Reiek BDO Pu Zothanmawia Khiangte in a kaihruai a.

Hall sak nan hian cheng nuai 18 vel sen a ni. Hall hi a dung feet 60 niin a vang hi feet 40 a ni a. Hall hi Social Education, District Development Fund leh MPLADS(Lok Sabha) te sum hmanga sak a ni. Pu John Rotluangliana chuan hall a hman atan plastic chair 100 a pe a ni.