Vawiin National Cleanliness Day 2015 hian Lawngtlai District-a sawrkar Office hrang hrang te leh Veng hrang hrang ten mahni remchang dan theuhvin faina hnatlang nei.

Khawpui chhunga veng tam zawk chuan vawiin hian nilenga hnatlang neiin vengchhung thenfaina hun an hmanga, zingkara hna bul tana chhun lama chhunzawm zel te pawh an awm bawk; hnatlanga thawkchhuak pawh an tha hlawm hle a ni.

Chutiang bawkin Office hrang hrangte pawhin mahni Office chhung leh a Compound theuhte thenfai hnatlang an nei hlawm a. Lawngtlai a Mizoram sawrkar Office lian bera chhal theih Deputy Commissioner Office pawhin faina hnatlang hi neiin Bawrhsap Pu J. Hmingthanmawia hovin Office tual leh hmunhma dangte an phiatfai a ni. Lawngtlaia Office lian zual heng Chief Medical Officer’s Office, Civil Hospital, Superintendent of Police, Project Director Office, AH &Vety Office, Divisional Horticulture Office, District Agriculture Office, Fisheries Development Office leh Office dang dang ten chawhnu lamah hnatlang hi an kova, BDO Office, Information and Public Relations Office leh Office dangte chuan chawhma lam atangin hnatlang hi an nei thung a ni.

Office thenkhat chuan chawhma lamah hnatlang hi an neih laiin Office tam zawk chuan hna pawimawhte thawk hmasa in chawhnu lamah hnatlang hi an ko a, Head of Office te anmahni ngei thawkchhuakin hna an tan sak a ni.