No.3958/2021-2022
Aizawl, 10th February, 2022 : Kumin March ni 4-a Chapchar Kut lawm dan tur chungchangah vawiin khan Programme Sub-Committee chu Chairman Pu R.Hmingthanzuala, Director, Art & Culture Department hovin a office ah an thukhawm a. Kumin chapchar Kut thupui atan Orgainising Committee in rawtna hrang hrang a chhawp chhuah zinga pakhat, Zonun Zemawi - Rinawmna tih chu thupui atan hman ni se, tiin rel a ni.
Nikum ang bawkin kumin Chapchar Kut hi Covid -19 hrileng avanga mipui punkhawm a remchan rih loh avangin Kut hawnna programme hi Vanapa Hall-ah mi tlemte chauh tel a, chumi hnuah virtual programme a chhunzawm turin ruahmanna siam a ni a. Hetih rual hian hripui karah Chapchar Kut hi hlim tak leh hlawk taka hman a nih theih nan Kut lawmna programme changtlung tak buatsaih bakah hian programme dang - TV Discussion leh hnam incheina a inthuam hun te, raltlan te leh public transport bakah traffic duty te tana thilpek hlan te pawh ruahman tel a ni a. Chapchar Kut souvenir changtlung tak buatsaih leh tum a ni bawk. Khawvel hmun hrang hranga Mizo awm ten Chapchar Kut lawmna programme hi an lo thlir ve theih tur leh chibai inbuk tawnna turin programme hi live-stream a kalpui turin ruahman a ni.
