No.3959/2021-2022

Aizawl, 10th February, 2022: State Level Committee on Fire Prevention in a lo rawt tawh bawhzuiin vawiin khan Champhai Police hotute leh Environment, Forest & Climate Change Department hotute chuan DFO Office Chamber,  Bethel Vengah inkawmhona neiin, kangmei ven chungchanga chak zawka hmalak tlan theih dan tur an sawiho.

Kangmei chhuak tur venna turin VC leh mipuite hnenah a zau thei ang berin kangmei tichhuaktu laka hremna dan hman lai mekte puanzar leh kangmei tichhuaktu lakah khauh taka hremna lekkawh nise an ti a. Ramvak thinte chu kangmei tichhuaktu ni fo a hriat an nih avangin ramvak lo turin mipuite an ngen a, ramvakte vai turin Wildlife Crime Control Sub Unit te duty nise, dan bawhchhia an awm a nih chuan dan angin khawng taka hmalak nise tih a ni.

Kangmei tichhuaktute dan hrang hrang hnuaia hrem theih dan te chu:-

1) Reserve Forest chhunga kangmei tichhuak chu The Mizoram Forest Act,1955 hnuaiah thla 6 thleng lungin tantir leh Rs.500/- chawitir theih a ni a.  Sanctuary leh National Park tikangtu chu kum 3-7 lungin tan leh Rs.25,000/- chawitir theih a ni.

2) The Mizoram (Prevention & Control of Fire in the Village Ram) Rules, 2001 hnuaiah ram tikangtu chu VC ten pawisa an chawitir thei.

3) IPC,1860 section 144 hnuaia thupek bawhchhiate chu CrPC Section 188 na hnuaiah thla 6 lungin tantira hrem theih a ni a, Rs.1,000/- chawitir theih a ni bawk.

4) Pawi lian tak thlen thei tura thil ruahmantu chu CrPC Sec 151 hnuaiah man nghal theih a ni.

5) IPC Sec 435 hnuaiah mi thlai ti kang chhia leh mi tana Rs.100/- man aia tam hlohna thlen chu kum 7 thleng tan tir leh pawisa chawitir theih a ni.

Vawiin meeting-ah hian Pu Lalrinpuia Varte, SP, Pu Lalduhthlana DFO & Member Secretary, District Level Fire Prevention Committee, Pu C.Lalengliana Addl. SP leh Official dangte an tel a ni.