No.3960/2021-2022

Aizawl, the 10th February 2022 : Vawiin khan Department 2 – Labour, Employment, Skill Development & Entrepreneurship leh Rural Development te chuan Larsap Dr. Hari Babu Kambhampati chu Raj Bhawan ah a hranpa ve ve in an Department hotulu te hovin an Department kalhmang te, hnathawh dan te, mawhphurhna an neihte leh Central Schemes an kalpui dan chungchang hrilhria in presention hmangin an Department chanchin an tarlang a.

Larsap chuan Labour, Employment, Skill Development & Entrepreneurship Department chu thalai tana a pawimawh dante sawiin sawrkar hna in thalai te a daih tawh loa, chuvangin thalai ten private lamah te, company lamah hna an zawn  leh an mahni kutkawiha eizawnna an neih a tul zel dawn a, hengah hian an tan skill development chu kawng pawimawh tak a ni, a ti a. Training Partner ten thalai te tan skill development training hrang hrang an kalpui mek chu a rintlak em, an thiamna pek te chu hna zawn nan leh eizawn nan a hmantlak em tih te chu chik thinin heng hmun te chu endika tlawh fo thin turin Department hotute a chah. Rural Development Department in Deen Dayal Upadhyaya Grameen Kaushalya Yojana (DDU-GKY) a kalpui mek chu thingtlanga thalai ten eizawnna kawng an neih theih nan kawng hawnsaktu pawimawh tak a nih angin Department hotute chu he scheme hi uluk taka vil turin a chah bawk a ni.

Presentation an pekah hian Larsap chuan Labour, Employment, Skill Development & Entrepreneurship Department in Central Scheme an kalpui mek Pradhan Pradhan Mantri Kaushal Vikas Yojana (PMKVY) leh Rural Development in Central Scheme in kalpui mek DDU-GKY te chu thlur bikin heng scheme te kalpui dan te chu Department hotulute chhipchhiar takin a zawt a, rawtna thenkhat a neih te a sawi lang bawk a ni.

Rural Development Secretary Pu Vanlalngaihsaka leh LESDE Secretary Pu Lalramsanga Sailo te chuan an Department officer te hovin presentation an pe a ni.