Vawiin khan Chapchar Kut Organising Committee in Chapchar Kut an hman tawh dante thlir letna hun hmangin an Chairman Art & Culture Minister Pu PC Zoram Sangliana hoin a office an thukhawm.

Pu PC Zoram Sangliana chuan Mizoten kan Kut ropui leh hlutawm tak vawn nun zelna atan kum tinin Chapchar Kut kan hmang thin a. Kan pi leh pu ten Chapchar Kut an lo hman thin dan ang a, hman remchang chiah lo chin awm bawk mahse tunlai Mizote sakhua leh nun nena inrem a hmandan her danglam hret a ni thin a. Mipui pawhin kan la hlutthiam viau niin a lang. Chutichung chuan mipui atangin thurawn tha leh faksel nate pawh kan dawng thin a, a lawmawm hle a ni a ti a. Chang tlung zawk leh mipui rilrem zawng a a hlu thei ang ber a kan hman tlan theih hi Organising Committee duh dan pawh a ni a ti.

Organising Committee hian ngun taka an sawiho hnuah Chapchar Kut Sub Committee an din a, an ni hian ngaihdan hrang hrangte thlir chungin Chapchar Kut changtlung leh hlimawm taka kan hman zel theih nan rawtna rawn duang se, Organising Committee in September thlaah la thlir leh nise an ti.

Chapchar Kut Sub Committee ah hian Chairman Pu R.Lalvena IAS, Special Secretary Art & Culture; Secretary Pu Vanlalruata, CYMA Gen.Secretary bakah Member atan Director, Art & Culture; President, MJA Gen.Hqrs; leh President Mizo Cultural Organisation te an ruat.