Vawiin chawhnu khan Pu R.L. Pianmawia, Govt. Deputy Chief Whip chuan Darlawn khuaah 33kV Grid Sub-Station a hawng a. He Grid Station hi North East Council bul tumin kum 2003 atang khan siam tan a ni a; a senso zawng zawng hi cheng nuai 497 a ni. Sum senso zaa sawmkua hi NEC chuan a tum a, zaa sawm hi Mizoram sorkar tum a ni. He Sub-station hian a awh ram 3055 sq.m. vel hi lei rawh chan hmanga hungchhuah vek a ni a, control room building hi 153 sq.m. a zau a ni. Kum 2004 atang khan he Sub-station hi kut thlak tan a ni a; Staff quarter te sa in P&E staff ten an thut chilh nghal a ni. Kum 2008 khan he Sub-station hi peih fel vek tawh ni mahse Power lakna tur 132kV, Saitual - Darlawn line chu siam zawh a nih lawk loh avangin charge theih mai a ni lo a. He power line hi peih fel a nih tak hnuah ni 12.3.2012 khan hlawhtling taka test charge a ni. Darlawn Sub-station hi Saitual-a 132kV Sub-station nena thlun zawm a ni a; tunah hian Saitual atangin 33kV level-a charge a ni. He Sub-station ah hian power transfomer leh feeder 5 (panga) a awm a, heng feeder 5 te hi Darlawn-I, Darlawn-II, Ratu, North Herzawl leh Sawleng khuaah te bun an ni. Hengte hmang hian Darlawn tlangdung chuan power supply tha tak a hmuh theih ngei beisei a ni a. Vawiin vek hian 132kV Saitual - Darlawn line, km 61-a sei chu hman tan a ni bawk a; he power line hi cheng nuai 1249.03 senga zam a ni. Vawiina hawn tak Darlawn Sub-station leh line hi 132kV level thlenga tih len theih tur a duan a ni.

Pu R.L. Pianmawia chuan kan bial, miten ‘hmar thimpui zangkhawbungbut hnan’ an lo tih thin chu Zoram sorkar duhsakna avangin tunah chuan kan lo eng ve thei tawh dawn a; hetiang hun kan thlen theihna tura theihtawp chhuahtute zawng zawng chungah lawmthu ka sawi a ni a ti. Pu R.L. Pianmawia chuan an bial chhung hmasawnna tura sorkarin kawng tinrenga hna a thawk chu lawmawm a tih thu sawiin, mipuite chu sorkar ruahmanna te thlawp thiam a, theihtawp chhuaha tawiawm thin turin a chah a ni. Miretheite leh kuthnathawk tute dinchhuahna tura NLUP buatsaih a ni hi kan tangkaipui ngei tur a ni a. Sorkar tanpuina tel lo pawhin kuthnathawha ei zawng kan nih chuan tanpuina hnuaiah phei chuan kan ding chhuak ngei ngei tur a ni a ti bawk.

Vawiina Darlawn Sub-Station leh Saitual - Darlawn Transmission Line hawnna inkhawm hi Er. Liannghinglova Pachuau-in a kaihruai a ni.