Vawiin khan Forester training chhuak te lawmpuina inkhawm Forest Training School, Bethlehem Vengthlang-ah neih a ni a. Environment and Forests Minister Pu H. Rohluna’n hmanpuiin Certificate leh chawimawina thilpek a titha zual mi pathum te hnenah a hlan.

Forester Training chhuak mi 10 te a lawmpui thu sawiin E &F Minister Pu H. Rohluna chuan sorkar leh ram tana chhenfakawm ni turin thil tangkai tak tak an zirchhuah ngei a beiseia, rinawm taka thahnemngaihna nena hna thawk turin a fuih. Minister chuan Forests Department-a thawktute chu mipuite chhiar tlak a hnathawk mi an nih a tul tiin ramngaw, thing leh mau nungcha tinreng humhalh tura mipui mimir hnena hrilh hretu an nih thin ang ngei chu an nunpui tur a ni, a ti a. Training chhuak te chu an hnathawh zui zel naah thil tha leh tangkai hmuchhuak thei khawpa thahnem ngai zui turin a hrilh bawk. Forests Minister chuan Forests Training School hmunhma thawm that leh tih changtlun tum a nih thu sawiin a senso tur sum leh pai pawh sorkar laipui atangin sum hmahruai a lo thlen tawh thu a tarlang bawk.

He hun hmanpui tu Addl. PCCF Pu Rosiama Vanchhawng pawhin thu sawiin training chhuak te chu Uniform ha chunga hna thawk tur an nih thu leh chu chuan kawng tinrengah mahni inthununna a keng tel tlat a ni tih theihnghilh lo turin a chah.

Tun tuma Forester train chhuak te hi mi 10 an ni a, thlaruk chhung kawng hrang hranga training an neih hnuah an zinga pathum Zothanpari Zote, Zirtluanga Hnamte leh Vanlalmawia Fanai te chuan Mark 85 chunglam hmuin Honours pek an ni a, a dang mi 7 te pawhin Mark 70 chunglam vek hmuin tha takin an Training an zofel thei a ni. Forest Training School, Bethlehem Vengthlang hi kum 1974 a din tan niin tun thleng hian he School atang hian Forester mi 288 an training chhuak tawh a ni.

Convocation Programme hi Forest Training School Principal Pu K. Kar chuan a kaihruai a, Course Director Pu F. Vanlalhruaia’n lawmthu sawiin hun hnung a khar a ni.