Vawiin khan Art & Culture Minister Pu R.Romawia hovin Chapchar Kut Organizing Committee a pisa-ah an thukhawm.

He hunah hian Sub- Committee hrang hrang te hmalakna thlir hona leh siamthat ngai ang ang te sawiho in siamthat nghal a ni. Kumin chapchar Kut thupui atan ‘Aia Upate Zah’ chu thlan a ni a. Kut pual hian ‘Chapchar Kut Run’ pawh neih tha tih  tlan a ni. Kumin Chapchar Kut chu kum dang zawng aia danglam bik Mizo hnam huapzo taka hman tum a ni. Meeting chuan district danga chapchar Kut hmanna atan District Organizing Committee te chu sum pek belh a remti bawk.

Kumin Chapchar Kut hi March ni 3 hian Aizawla Sipai lammual ah hman leh tura ruahman ani a. Mizoram Chief Minister Pu Lal Thanhawla chu Kut Pa tur niin, Art & Culture Minister Pu R.Romawia chu Kut Thlengtu a ni ang. Mizo mipuite huapzo thei tur ang bera hman a nih theih nan  programme buatsaih ani ang a, mizo hnam zia hrang hrang te pholanna- zai, lam leh rimawi chi hrang hrangte hmuh leh hriat tur a awm dawn a. Manipur, Assam, Meghalaya, Tripura leh Myanmar lam atang te pawhin zohnahthlakte he kut hmang tur hian an lo kal dawn a ni.