Vawiin khan School Education Minister Pu H.Rohluna chuan Mizorama lo zin Union Minister for Science & Technology Pu Harsh Vardhan leh Union Minister of State for Home Affairs Pu Kiren Rijiju-te chu Aizawl-ah a hmu a, Mizoram-a CSS Hindi Teacher-te harsatna chungchangah hmalakpui turin a ngen.
School Education Minister hian nimin kahn Union Minister for Science & Technology Pu Harsh Vardhan chu hmu in, vawiin chawhma dar khan Assam Rifles Hqrs Khatla-ah Union Minister of State for Home Affairs Pu Kiren Rijiju chu hmu lehin D.O letter a pe bawk a. CSS Hindi teacher-te dinhmun a sawipui a. School Education Minister chuan Mizoram chu Hindi tawng hmanna ni lo, tawng leh khawsak dan hrang anih thu leh hemi avang hian ram chhung hmundangte nena inpawh a harsat thu te, Hindi chu Mizoram state tan ramchhung hmundangte nena inbiak pawhna leh inpumkhatna atana pawimawh anih avangin Hindi tawng zirtir chu a tangkai thu te a tarlang a. CSS Hindi zirtirtu, sum indaih loh avanga May 2016 atanga hlawh la mumal tawh lo, sorkar laipui Revised Estimate nghakte chungah khawngaihna lantira hmalakpui turin a ngen a. CSS Hindi teacher te hlawh chu a zavaia Central sorkar tum a nih avangin an hlawh pek thuai an nih theih nan leh, chumi bakah chuan Hindi teacher-te, March ni 1, 2017 atanga kum 10 dang atana rawih chhunzawm an nih theih nan te, sorkar laipui tirh a third party
independent research agency ten thla thum chhung Mizoram-a zirchianna an neih chhunga ruai chhunzawm rih tura ngenna an siam thute a tarlang bawk. Pu H.Rohluna hian Hindi zirtirtu te thla 10 hlawh Rs 39,05,26,648/- chu sorkar laipuiin a pek chhuah thuai theih nana hma
la turin a ngen bawk a ni.
Union Minister Pu Kiren Rijiju chuan School Education Minister thu thlen chu a ngaih pawimawh thu leh New Delhi-a a kir leh hunah theih tawp a chhuah tur thu a sawi a. Pu H.Rohluna’n Union Minister pahnih a hmuhnaah hian Parliamentary Secretary Pu Joseph Lalhimpuia chuan a tawiawm a ni.
