Ni hnih awh tur DigiDhan Mela (Digital Payment Fair), Millenium Centre Rooftop-a buatsaihah vawiin khan Union Minister for Science & Technology Dr. Harsh Vardhan chu khuallian a ni a. Union Minister of State for Home Affairs Pu Kiren Rijiju leh Information & Communication Technology Minister Pu Lal Thanzara te chu khualzahawm an ni bawk. DigiDhan Mela, Millenium Centre Rooftop-a ICT Department leh Deputy Commissioner, Aizawl tangkawpin an buatsaih hi School Education Minister Pu H. Rohluna, Parliamentary Secretary Col.Z.S. Zuala leh Joseph Lalhimpuia, Chief Secretary Pu Lalmalsawma leh sawrkar mi pawimawh dang te an tel bawk. Digi Dhan Mela hi NITl Aayog-in India economy in hma a sawn theihna tur atana rampum huap a hma a lak mekna lian tak pakhat a ni a, Central Sorkar flagship programme pakhat, Digital lndia Scheme hnuaia pawisa Note hman tihtlem tumna kal zel atana lo in buatsaihna a ni.

Union Minister Pu Harsh Vardhan chuan Mizoram chu lehkhathiam tam tak awmna state a nih avangin cashless transaction kokim taka kalpui theihna state hmasa ber te zing a mi a nih theih a beisei thu a sawi a. Digital India hnuaia hmalakna te hi langtlang taka kalpui, mirethei leh te ber pawh thlang phak a nih thu sawiin, Union Minister chuan chakkhai mamawh lei nana pawisa note hman chu thil nihphung anga kan ngai ang chiahin cashless payment pawh kalphung pangngai a nih thuai a beisei thu a sawi a ni. India ram mipui tam zawk thlalai an nih avangin he hmalakna hian kawngro a sut tur thu leh, ram economy pawh a tha chak phah hle a beisei thu a tarlang a. Digi Dhan Mela neih chhung ni hnih ah programme chu zo mai lova, zau zawka cashless payment chu hman uar leh tlanglawn a nih theih nan kalkhawmte chu tan la turin a sawm a. He scheme in a kaihhnawih sorkar hnathawk zawng zawng, banker-te leh mipuite chu an hmalak tawhnaa lawmthu a sawi bawk. Pu harsh Vardhan hian India hmarchhaka cheng ten tan thil tam takah harsatna an tawh thin chu Sorkar laipuiin a hraitpui thu leh, a ngaihpawimawh thu a tarlang bawk.

Khualzahawm Union Minister of State Pu Kiren Rijiju pawhin thu sawiin, digital transaction hi khawvel changkanna in a ken tel anih angin hemi rual hian ke kan pen ve tur a ni a ti a. Huapzau zawka inhrilhhriatna hun tha leh hlawhtling tak an buatsaih thei chu lawmawm a tih thu sawiin, chutihrual a inkalpawhna that loh leh thildang vanga India hmarchhak state ten harsatna an tawh thin tam tak pawh a hriatpui thu tarlangin, sukiang tura hmalak a nih thu leh, kum 2019 tawpah chuan India hmarchhak a khua awm zawng zawng chu 3G internet connection thleng phak vek tura hmalak a nih thu a tarlang bawk. Pu Kiren Rijiju chuan India hmarchhak state te hi state nuam tak tak vek, kawng hrang hranga mawlsamna in a vur state-te an nih thu sawiin, ram leilung in a zirloh vanga ei leh bara thuanawp bik thin mah ila a chhunga cheng ten nasa leh zuala hmasawn tum a pawimawh a ni, a ti a. ‘Hna tha zawk zawngin mi tupawh an chenna chhuahsan in hmun dangah an kal thei vek a, amaherawhchu kan state kan chhuahsan chhan hi kan duh thu ngei a ni tur a ni a, opportunity a awmloh avanga duh pawh thlang thei lova hmun dang pan ngai khawpin kan insiam tur a nilo’ a ti a ni. Union Minister of State for Home Affairs chuan sawrkar laipuiiin India hmarchhak a ngaih pawimawh em avangin Look East Policy pawh Act East Policy-ah thlak a nih tak thu te tarlangin, North-east region tihhmasawn na tur scheme leh programme kalpuite hi a chhunga cheng te chuan kan zawm a kan phurpui thiam ve a pawimawh thu a sawi bawk.

ICT Minister Pu Lal Thanzara chuan "Digital India" hnuaia project hrang hrangte chu a hlawhtlin theih nan State sawrkarin ngawrh taka hma a lak thu a sawi a . Heng hmalakna hrang hrang hlawhtlinna hi digital connectivity tha leh chak ah a innghat a, chung chu inkalpawhna tha, mobile/internet signal tha leh bank account neih ah te a innghat chhawng leh ani tiin, chung atan chuan Sawrkar Department-te, Bank a thawkte leh pawl ang zawng pawha kawng hrang hranga hmalak dan a tarlang a. Ministry of Electronics and Information Technology chuan Department of Information & Communication Technology leh Mizoram State e-Governance Society chu an thawh that avanga ‘Skoch Platinum Award’ a lo hlan tawh thu a tarlang bawk a. Digital Payment Fair avangin mipuiin cashless payment an uar sawt a beisei thu a sawi bawk.

Digi Dhan Mela inkhawmah hian Union Minister Dr. Harsh Vardhan chuan Pu Thanglianmawia, POS, Sakawrdai ami hnenah mi nuai 2 dawn tan banking transaction a lo tih sak tawh avanga chawimawina chu a hlan a. Digi Dhan puala Slogan Contest, Poster Contest leh Jungle Contest neih a tithate hnenah khualzahawmte hian lawmman an hlan bawk a ni. Hun hi Aizawl DC Pu Kannan Gopinathan chuan lawmthu sawiin a khar a ni.

Mela-ah hian Mizoram a sumdawng leh Bank hrang hrangte an tel a, Internet leh Mobile Phone Software Applications (BHIM etc.) hmanga pawisa khawih Chet (transactions) dan te a tak a hman niin, a hmunah hian mipuite zirtirna pek a ni a. Mela-ah hian Bank Account, PAN Card leh Aadhar Card te pawh Document tul angte rawn kengin siam sak nghal theih a ni bawk. Mela ah hian stall 60 chuang hawn niin, Sorkar official te, Bank hrang hrang, lT Institution leh sumdawng ten mipuite hriat atan a pawimawh Bank Account hawn chungchang, Aadhar Card, PAN Card leh Bank Account thlunzawm pawimawhna na te leh hriatthiam loh an neih te lo dawngsawngin a lo pui an ni.