4539/2024-2025

Aizawl dated 5th March 2025: Vawiin chawhma khan Chapchar kut 2025 lawmna pual a Art & Culture Department buatsaih, ni hnih awh tur, hmanlai mizo nun zia entirna hun, 'Live Demonstration of Mizo typical life' chu Falkawnah Pu TBC Lalvenchhunga, Adviser to Chief Minister chuan a hawng a. Kumin Chapchar kut thupui, Mizo nun ze mawi hawihhawmna chawi nunna atan a hmalakna tangkai tak ni turin duhsakna a hlan.

Adviser to Chief Minister Pu TBC Lalvenchhunga chuan hnam anga kan thanlenna tur leh hmasawnna tluantling nei tur chuan kan chawrchhuahna hnam ziarang humhalh leh chawisan hmasak a pawimawh thu sawiin khawtlang nuam siam tur chuan mizo nunze mawi, aia upa zahthiamna, hawihhawmna, rinawmna leh tlawmngaihnate, thangtharte nun a tuh nun zel a pawimawh thu a sawi a. Art & Culture Department hmalakna a Falkawnah ni hnih awh tur, mizo ziarang pholanna hun buatsaihna hian thangtharte nun ah hnam ziarang humhalh duhna leh mizo nun ze mawi chawisan duhna thinlung puttirna hmanraw tangkai tak ni turin duhsakna a hlan a ni.

Falkawnah 'Live Demonstration of Mizo typical life' hawnna hun hi Pi Carol VLMS Dawngkimi, Director, Art & Culture Department-in a kaihruai a. Zo khua ah hian Lal in, Khawnbawl in, Zawlbuk, Thir deng in, Pum, mi naran in leh hmeithai in a awm a. Heng in ahte hian mizo thuam leh hmanraw chi hrang hrang nen mizo khawsak zia entir a ni a. Naupang pawnto leh mizo infiamnate, mizo la deh dan hrang hrangte entir a ni bawk. Heng hmanlai mizo nun dan entirna ah hian Govt. Middle School, Melriat, Falkawn MHIP, MUP leh YMA member-te an tel a. March ni 5 leh ni 6, chawhma dar 10 atanga chawhnu dar 4 thleng, a thlawn a tlawh thei a ni.