4540/2024-2025 

Dated Serchhip, the 5^th March, 2025: Vawiin khan Serchhip DC Pu Paul L Khuma hoin Serchhip District Nasha Mukt Bharat Abhiyan (NMBA), NCORD leh Task Force on Ruihhlo Do Committee member te chuan a huhoin Serchhip DC Meeting Hall-ah an meeting an nei a. Serchhip District a chak leh zuala ruihhlo do dan tur chungchang an sawiho.  

DC Pu Paul L Khuma chuan an inhmuhkhawm chhan sawiin NMBA, NCORD leh Task Force te hi tum thuhmun an nih avangin inpawh tlang taka hna an thawh ho chuan sawt zawka ruihhlo do a beiseiawm a ni, a ti a. Demand, supply leh harm reduction te chu an thil tum bulpui ber a nih thu a sawi.  

Vawiin meeting ah hian Committee peng hrang hrang pathum te hian an hmalakna an report a. Ruihhlo la ti ngai lo ten an tih chhin lohna tur te, a la ti mek ten an sim theihna tur tea zirtirna an kalpui dan ngaihthlak a ni a. Heng Committee peng hrang hrang te hian Serchhip District chhunga khaw hrang hrangah vak chhuakin zirna sikul, sunday school, College leh YMA Chhang te zingah Awareness Campaign hi hmun hrang hrangah an nei thin a ni. 

Vawiin meeting-ah hian Excise and Narcotics, police, Assam Rifles leh BSF te hnen atangin report ngaihthlak a ni bawk a. Excise and Narcotics te hian kum 2025 chhung hian NDPS Act hnuaiah case paruk an ziaklut hman a ni. Ruihhlo tawlh ruk leh zawrh chungchanga report hrang hrang inhrilhriat tawn - intelligence sharing neih dan rel a ni a. Heng force te bakah hian tlawmngai pawl YMA te pawhin an thudawn te awlsam taka an report zung zung theih dan tur ruahmanna siam a ni a. Force tinah information pekna atana biak pawh bik tur mi thlanchhuah ni se, mipui pawhin police ah emaw excise lamah an report theihna turin phone number tarlanga hriattirna tihchhuah chungchang te pawh vawiin hian an rel a ni. Tlawmngai pawl leh force te thawhhona Ruihhlo Do Squad pawh ti tawp mai lova chhunzawm zel tha an ti a, a theih anga tam duty ho ni se tiin an rel bawk a ni.  

Tleirawl zingah prescription drug hluar chungchang sawi lan niin Drug Inspector te hmalakna ngaihthlak a ni a. Schedule H drug license nei te chu an dawrah CCTV vuah theuh tura thupek an nih angin Serchhip District ah hetiang license kawl dawr 30 zingah 28-in an vuah tawh a. Schedule H drug hnuaia prescription drug te hi dan lo anga pechhuak an awm tih hriat a nih chuan an bawhzui nghal thin thu leh chutiang hria an awm chuan report thin turin an ngen a ni. 

Vawiin meeting-ah hian sawrkar official te bakah tlawmngai pawl YMA leh MHIP aiawh te an tel a ni.