Zobawk Group YMA buatsaihin vawiin khan District Park Lungleiah Chapchar Kut lawmna hun hman a ni a, HPC Vice Chairman Pu Lawmawma Tochhawng chuan Kut Pa niin a hman pui a ni. 

He hun hi Zobawk Group YMA Vice President Pu R. Ramthianghliman a kaihruai a, Kut Pa Pu Lawmawma Tochhawng chuan thusawiin kan hnam nihphung leh zia kan hriat renga kan uar deuh deuh loh chuan hnam boral kan ni thei a, kan sakhuana leh mizo zia tangkawpa kan kalpui chuan hnam ropui tak kan ni thei dawn a ni tiin vawiina kan kut hman hi mitinin kan mawhphurhna, kan hmalam huna finna leh thiamna atana hmasawnna min petu atan kan hman tangkai a pawimawh hle a ni a ti bawk. A sawi zelnaah Pu Lawmawma Tochhawng chuan vawiin anga kan hnam Kut ropui tak hmun hrang hranga mipui kan lawm thei hian kan hnam ngheh zia leh a ropui zel dawn a ni tih a tilang chiang hle a ni tiin he kut hian inpumkhatna leh inunauna thazawk a thlen ngei ka beisei a ni a ti bawk.

Zobawk Group YMA buatsaih Chapchar kut lawmnaah hian YMA Group chhunga  Branch 12 ten chanvo hrang hrang hnam lam leh zai, mizawn inchuh te an entir a, Lunglei Photographer Association ten Leitlang Dingdi leh naupang atangin Chapcharkut Nauban an thlang bawk a ni.