Vawiin Tahrik Ni 1, Vau thla khan Champhai Kahrawt Field-ah Sub-Hqrs. YMA Champhai  kaihhruainain Chapchar Kut ropui taka lawm a ni a,  He hunah hian Pu TJ Lalnuntluanga, Law & Judicial, Parliamentary Affairs, Forest leh Transport Department-te changtu Minister chu Kut Pa a ni.

Kut Pa chuan Kut chhimtute chibai bukin hun tha tak siamtu District Chapchar Kut  Celebration Committee-te hmalakna leh Pathian kaihhruainaah  lawmthu a sawi a. Chapchar Kut lo chhuah dan sawifiahin,  Lo vah zawha zum leh hriam atanga dam taka an chhuah avanga an lawmzia entirna leh lawmthu sawina tura hman thin a ni, a ti a. Hun kalzelah sakhuana rilrem zawnga her rem ve zel anih thu tarlangin, 

Chapchar Kut chuan harsatna, beidawnna  leh hnungtawlhna ata beiseina nei tura hmalam panna a entir a ni, a ti a. Kumin Chapchar Kut thupui atana Zofate inpumkhatna thlan ani chu inhmeh a tih thu a  sawi a, Vawiin atang hian tumah inlahranga, inenhrang lovin insuihkhawm leh zai i rel ang u, a ti a. Zofate insuihkhawmna turin Sawrkarin hma a la zel a, Champhai leh Tahan inkar Bus service siam tum pawh chak taka hmalak niin, Sawrkar laipui atangin bawhzuina lehkha pawh hmuh anih tawh thu a sawi a. 

Pu TJ Lalnuntluanga chuan hnam zahawm leh ropui ni tur chuan intodelh angai a, Sawrkarin chumi hlenchhuak tur chuan hma ala zel dawn a ni, a ti a. Kut Pa chuan Mizo Kutpuiah te zo ziarang tam zawk chhawpchhuah anih theihna turin kutpui leh puipun thlenna hmun tur bik  Zokhua  Champhaiah din tum anih thu a sawi a.

Chapchar Kut lo thleng chuan hnam leh sakhaw kaltlanga  rorelna pakhat hnuaia zofate  awm theihna turin kawng hawng se a duhawm hle dawn thu a sawi a. Minister chuan  Sawrkarin Mizo hnam ziarang chawinung kawngah theihtawp a chhuah zel dawn thu a sawi a. Kut hmang tura kalkhawmte hun tha leh duhawm tak hmang turin duhsakna a hlan a ni.

Champhai District Bawrhsap Dr Naveen Aggarwal pawhin thusawiin Kut hmang tura kalkhawmte thinlung taka a lo lawm thu a sawi a. Chapchar Kut chu Mizo te kutpui pawimawh langsar pathum zinga pakhat a ni, a ti a. Tunlai khawvel buai leh changkang zelah mitinten inkawmhona leh intihhlimna kan nei  tlem tial tial a,   buaina kalsana hun thawl leh thawveng neih chu mihringten kan mamawhin a tul a ni, a ti a. District mipuite chu sum khawlna chang hre tura chahin, sum khawl chu  dam mawh hritlan nikhua leh zirna senso atan a tangkai thin thu a sawi a. Zirna sang zawk ngaihvena Vocational Studies lam hawia tanlak pawh a tul thu a sawi a. Champhai District chu ramri depa awm anih angin ruihhlo leh damdawi hmansual a tam avangin fimkhur lehzual a tul a  ni, a ti a. Zirlai naupangte hnenah tawng thiam tam a pawimawh thu hrilhin, Tawng thiam tam chuan nakin zela zirna sang zawk belh kawngah a puih theih dawn thu a sawi a. Sikulah a tam thei ang ber saptawng hman nise nu leh pa leh zirtirtu leh zirlai ten zawm theih nise a duhawm ngawt ang a ti bawk.

Champhai Bawrhsap chuan District chhungah  buh leh bal, thlaite hlawk zawka thar anih theihna turin tuihnianghnar zawk neih angai a, District Level Committee siama Line dept hrang hrangte tangkawp hmalaknain District hmun hrang hrangte thensawma hmalak tum ani, a ti a. District mipui te Chapchar Kut hlim taka hmang turin duhsakna a hlan a ni. 

Vawiin Chapchar Kut-ah hian Sub-Hqrts. YMA Champhai thuthmun huamchhunga Branch YMA hrang hrang atangte, Zomi Cultural Society (ZCS), Sub Hqtrs MHIP leh MUP  lam atang ten  malzai, zaipawl, rimawi tum leh hnam lam benglut tak takte ngaihtlaka thlirho a ni a. A huhoin Kantluang cheraw Bu 25, Buhza-aih cheraw Bu 18 leh Chawnglaizawn mi 650 ten an entir a. Branch pualin hnamlam chi 4 , ZCS ten  Zangta Lam an entir bawk a, Sub Hqtrs MHIP ten Par lam an entir a, MUP Sub Hqtrs in lemchan an entir  bawk a,  Chai a Kut hun kharna hman a ni.

Chapchar Kut puala lawmman hrang hrangte sem a  ni a. Sawrkar Pisa  Kut hma kar Mizo thuama inthuam  thazualte hnenah lawmman hlan a ni a. Pakhatna chu SE Office, P&E Department, Pahnihna chu BRC SSA Champhai Office ani a, WATSAN Division PHE Champhai chu pathumna niin, SDHO Office Champhai chu Palina a ni. Lawmman pangana latu pahnih awmin District Court Champhai leh CMO Office    Champhai te an ni. Heng bakah hian Kut lawm tura lokal Naupang kum 6 hnuailam Mizo hnam incheia inchei nalh mipa leh hmeichhe naupang thlan chhuahte hnenah  lawmman sem anih bakah  Chapchar Kut Miss 2019  hnenah lawmman hlan a ni bawk. Chapchar Kut hi Mipui ten an hlut hle a ni.