Chapchar Kut 2019 lawmna pui ber chu vawiin khan Sipai Lammual ah hman niin, hnam lam hrang hrang leh zai leh rimawi te entir a ngaihthlak ho a ni. Kumin Chapchar Kut lawmna ni hnih naah hian Chief Minister Pu Zoramthanga chu Kut Pa niin Art & Culture Minister Pu R. Lalzirliana chu Kut Thlengtu a ni.

Kut Pa Chief Minister Pu Zoramthanga chuan kalkhawmte Kut chibai bukin, tun Chapchar Kut lawmnaah hian Mizoram chhung mipui chauh nilovin Burma, Assam, Meghalaya, Tripura, Bangladesh leh state dang ram danga kan unaute nen kan inzawmna leh inpumkhatna a lo ngheh zual zel theih nan bul i tan thar ang u, tiin kut lawmtute chu a sawm a. Siamtu malsawmna dawngin Mizoram chuan a chhunga cheng zawng zawng buh a chawm zo thei tur ram tha leh zau tawk tak, ruahtui tha, boruak lum leh vawt, sik leh sa duhthusam, lei hnuaia oil leh gas reserve thahnem tak, leichungah engkim that duhna ram a neih thu Chief Minister chuan sawiin, heng malsawmna te hi a tangkai thei ang bera hmang a, ram hausakna haichhuah chu thangtharte tan chona a nih thu leh chu chona chu tihhlawhtling turin theihtawp chhuah tlang tur kan nih thu a sawi. Chief Minister chuan tuna kut hmanna Lammual hi tunah chuan Assam Rifles atanga hmang hawh ni rih mahse kumin June thla atang chuan he hmun hi Mizoram ta a ni tawh tur thu a sawi a. Chapchar Kut hlimawm tak hmang theuh tura kalkhawmte duhsakna a hlan bawk.

Kut Thlengtu Minister Pu R. Lalzirliana chuan Chapchar Kut kan lawm rual hian Pipute nun mawi, an tlawmngaihna leh dikna te chhar thar leh turin mipui a chah a ni. Art & Culture Minister chuan Pipute hunlai khan an huaisenna kha a hun takah tilangin, an khua leh tui humhim nan mi ngamloh neih an duh ngaihloh thu sawiin, tunlai khawvel ral do awm tawhloh naah erawh chuan kan hmanraw pawimawh ber chu kan thiamna hi a ni, a ti a. Kawng hrang hrangah hnamdang tlukloh thiamna leh theihna inthup thangthara awmte chu lanchhuahtir turin a chah a. Minister Pu R. Lalzirliana chuan Chapchar Kut hlimawm tak hman rual hian inunauna leh Zonun zemawi chu a thar a nunpui leh theuh turin kalkhawmte a chah a ni.

Vawiin Chapchar Kut lawmnaah hian Chapchar Kut Organizing Committee in a lo rel tawh angin mi pathum - Everest tlang lawnchhuak pahnih - Pu David Zohmangaiha leh Lalrintluangi te leh Footballer Jeje Lalpekhlua te Chawimawina Nopui hlan a ni a. Lawmman hi Kut Pa in a hlan a. Chapchar Kut hmang tura Myanmar atanga lo kal, Tiddim Literature & Cultural Committee ten Kut Pa leh Kut Thlengtu hnenah hian Kut thilpek an hlan bawk a ni.

Chapchar Kut lawmna ni hnihna hi chawhma dar 10:30 ah hman tan niin, MCAA ten Hla Do nen hun an hawng a. CYMA Chairman Pu Vanlalruata chuan inlawmna thusawiin, maizai leh zaipawl hrang hrang bakah lemchan te  thlirho a nih bakah CYMA  buatsaihin Cheraw Kanpui neih a ni a, hemi ah hian Branch 94 atangin an thawkchhuak a ni. Art & Culture Director hnen atangin lawmthu sawina ngaihthlak a ni.

Kut lawmnaah hian hmun hrang hranga Zohnahthlakte sawm zingah Falam, Tidim, Halflong, Tahan, Shillong, Manipur leh Bangladesh atangte in chhimtu an awm a ni. Mizoram district tin bakah state dangah pawh Zofaten Chapchar Kut hi an lawm ve bawk a ni.