Vawiin khan Vairengtea Joint YMA khelmualah Chapchar Kut hlim takin hman a ni a, Pu Lalchhandama Ralte, School Education Minister chu Kut Pa a ni.

Kut Pa Pu Lalchhandama Ralte chuan thusawiin Vairengte chu India ram hmundangte nena inthlunzawmna kawtchhuah anih avangin Zo hnamzia kan par vultir hian Mizo zia a chawimawi bik a, uar deuh deuh pawh a tul a ni a ti a. Kan hnamzia hi a boral chuan hnam anga kan nihna hi kan theihnghilh ang tih a hlauhawm a ni a ti a. Vairengteah Zo hnamzia kan parvultir hian Mizo hi a chawimawi bik a. Kawtchhuaha awm an nih avangin hnam issue a awm thin a, chutiangah chuan Vairengte nula tlangvalten Mizo thinlungah thu an sawi bik thin a ti a.   Hetiang dinhmunah hian  inpumkhatna nena hmachhawn a ngai thin a ni a ti a. Hun lo kal zelah pawh ram leh  hnam thil chi hrang hrang hmachhawn a tul hunah inpumkhatna vawng nung tlat turin a sawm a ni. India ram hmun hrang hrang a awm te inthlunzawm nan Vairengte hi a pawimawh a, kumin chapchar kut, Cachar a Noksatilla te nena an hmangho chu lawmawm a tih thu a sawi a, hun lo kal zel turah pawh kan chhehvel hnamdangte nen hmangho zel tura a duhsak thu a sawi bawk.

Kut thlengtu Pu Lalrinsanga Ralte Serlui bialtu MLA pawhin chapchar kutah hian thusawiin zofa peng hrang hrangte hi Mizoram, Manipur, Myanmar leh Bangladesh ah then hranin kan awm a, tlang hrang hrangah awm mah ila, hnam chuan ramri a nei ve lo. Chuvangin inpumkhata awm zel turin zirna leh hnathawhnaah taimak i chhuah zel ang u tiin mipuite a sawm. 

Vairengtea Chapchar kut hmannaah hian Zofate insuihkhawm tih thupuiah hman a ni a. Zirna leh hnathawhna lama mi hlawhtlingte chawimawina hun an hmang a. Vairengtea YMA Branch hrang hrangten a rualin cheraw an kan a, cultural club ten hnam lam an entir a,  costume parade, kal chhet, inkawibah, Mizo pa lian inchai te neih a ni a, Miss chapchar kut thlan a ni bawk. 

Chapchar Kut Vairengtea hmannaah hian khawtlang mipuite, tlawmngai pawl hrang hrangte leh sorkar hnathawkte an kalkhawm a. School Education Minister hi a nupui Pi Flora Rosangpuii bakah School Education Jt Director Pu Lalhmachhuana leh Dy. SPD, RMSA Pu C.Chawngthantluanga ten an tawiawm a ni.