Vawiin  khan Lunglei Thuamluaia Mual-ah ‘Zofate Inpumkhatna’ tih thupuia hmangin Chapchar Kut ropui taka lawm a ni a, Pu Lalrotluanga, Sub Hqrs YMA President chu Kut thlengtu niin Lunglei West AC bialtu MLA Agriculture Minister Pu C. Lalrinsanga chu Kut Pa a ni. Kut Pa hi 2nd Battalion MAP Pipe Band ten an lo lawm a ni.

Chapchar Kut thlengtu, Pu Lalrotluanga chuan Kut hmang tura kalkhawmte  lawmna thu sawiin chibai a buk a. Hmasawnna leh changkanna pawhin a chim bo zawh loh, vawiin thlenga chhawm nuna awm Chapchar Kut Mizoten kan nei chu a nihlawhthlak thu a sawi.

Kut Pa Pu C. Lalrinsanga chuan Chapchar Kut hmang tura kalkhawm zawng zawng te duhsakna chibai bukin Kut ropui taka hman anih theihna tura Chapchar Kut Organizing Committee-te inpuahchahna chu fakawm a tih thu a sawi a. Mizo hnamin Kut kan neih hlu ber, kum tina ropui taka kan lawm Chapchar Kut chuan Zofate inpumkhtana pe a, min phurkhawm hi a hlu takzet a ni tiin hnam culture khawvel mit hmuha pholang tute hi hnam tana economy bengbel tlat tu an ni fo thin a ni, a ti. Chapchar Kut thupui thlan ‘Zofate Inpumkhatna’ vawng nung turin mawhphurna kan nei theuh a ni tiin Chapchar Kut hmang tura kalkhawmte chu Kut nuam leh hlawkthlak tak hmang theuh turin duhsakna a hlan a ni.

Chapchar Kut hawnna inkhawm ah hian Rev C. Lalrintluanga, Treasurer UPC Lunglei District-in hunserh hmangin Pu Ngurthansanga Sailo, Secretary Chapchar Kut Organizing Committee atangin report ngaihthlak a ni.

Vawiin Chapchar Kut lawmna ah hian Lunglei khawpui leh a chhehvel khaw mipui thahnem tak kalkhawmin YMA Sub Hqrs Lunglei Zaipawl, MZI Dist Hqrs Lunglei Zaipawl, Branch YMA hrang hrang atangte,MHIP leh MCAA  lam atang ten  malzai, zaipawl, rimawi tum leh hnam lam ngaihtlaka thlirho a ni a. Mizo hnamlam pholan zingah Parlam, Chawnglaizawn, Sing sing tang lam, solakia, Chheih lam leh Chai, Sarlamkai, Cheraw te entir  a ni. Tin, Muallianpui South Branch YMA ten Sakei Lu Lam entirin Baptist Higher Secondary School (BHSS) ten Naupang Pawnto an entir a. Gurkha Youth Association, Lunglei te vohbik chanvo pek an ni. Tin, hemi bakah hian Chapchar Kut Miss leh Hraite thlanna neih a ni bawk.