37/2023-2024

Tau thla ni 5, 2023: Kumina Chakma Autonomous District Council (CADC)-a Member of District Council (MDC) Inthlanpui buatsaih tura hman tur final electoral roll chu vawiin khan Assistant District Election Officer, Lawngtlai & Additional Deputy Commissioner Pu Abraham Beirazi Khithie chuan Chawngte SDO (C) Conference Hall-ah a tlangzarh a. Final electoral roll hi political party ai awhte hnenah a hlan nghal.

Pu Abraham Beirazi Khithie chuan CADC MDC Inthlanpui, 2023-a hman tur final electoral roll tlangzarh a nih theih nana rim taka thawktute chungah lawm thu a sawi a. Dik leh fel taka inthlan kalpui a nih theih nan hma lak mek a nih thu sawiin, inthlan thianghlim, felfai leh muanawm tak a awm theih nan political party te thawhpuina ngenin duhsakna a hlan nghal a ni.

He hunah hian Election Officer Pu Daniel Sailo chuan CADC final electoral roll an buaipui dan report pein, final electoral roll dinhmun tlangpui a tar lang bawk.

Final electoral roll tlangzarh tak atanga a lan danin, CADC-a MDC Inthlanpuia vote nei thei mipa 18,208 leh hmeichhia 17,677, an vaiin mi 35,885 an awm a. Draft roll a?angin voter 587-in an pung a ni.

MDC bial 20 awmah, 5-Kamalanagar 'N' Constituency chu voter tamna ber niin, voter mipa 1,750 leh hmeichhia 1,783, a vaiin voter 3,533 an awm a. 18-Fultuli Constituency chu voter tlemna ber niin, voter mipa 677 leh hmeichhia 628, a vaiin voter 1,305 an awm.

Polling station 70 awm zingah, 9/1-Ugudasury 'S' Polling Station-ah voter 1,051 awmin, polling station malkhaia voter tam berna a ni a. 13/4-Charluitlang Polling Station-ah voter 144 awmin, voter tlemna ber a ni thung.