38/2023-2024

Vawiin khan Joint YMA Hall, Aizawla programme buatsaihah Formosa Foundation India chuan Serchhip District YMA Branch hrang hrang 28 leh CHC Biate, PHC North Vanlaiphai, East Lungdar, Khawlailung hnenah Oxygen Concentrator a hlan. He hunah hian Home Minister leh Hrangturzo Constituency MLA ni bawk Pu Lalchamliana chu khuallian niin Oxygen Concentrator 32 hlanna hun a hmang.

Khuallian Pu Lalchamliana chuan Mizoram a NGO lian ber YMA hnenah Formosa Foundation in Oxygen Concentrator kawl him a, tangkai taka hmang tura a hlan chu fak awm a ti a. YMA te chu khawtlang ti mawitu, mi harsa te tanpui thin tu niin, Formosa Foundation hian YMA pawimawhna a hrechiang a ni a ti a. YMA branch ten thliarbik neiloa, a mamawh a piangte hnena tangkai taka hmantir turin duhsakna a hlan nghal a. Hetianga khawtlang leh mipui rawngbawlna kawnga thahnemngai taka Formosa Foundation te an penchhuak thin chu fakawm a ti a. Oxygen Concentrator te hi mipuite tana tangkai leh mamawh, natna khirh tak tak tuarte nun chhanhim theitu a ni a, man to tham tak te a nih avangin awlsam taka lei a harsa a, Serchhip District chhung khaw hrang hrang te leh hmundangten a thlawna an dawng thei hi a lawmawm hle a ni tiin a sawi.

Khuallian Pu Lalchamliana chuan vawiina YMA Branch hrang hrang kalkhawm library-a dah tur lehkhabu, Pu C. Zahmuaka ziah, 'Ka Hringnun Zin Kawng' chu a hlan nghal a ni.

He hun hi Pu Vanlalruata Ralte, Coordinator Formosa Foundation India chuan kaihruaiin, Pu Jonathan Lalremruata, Chairman Formosa Foundation chuan Formosa Foundation chungchang khuhhawnna a nei a. Pu Rorelliana SEC Member, Sub-Headquarters Serchhip District chuan lawmthu sawina hun a hmang a, Pu R.Lalneihsanga, Secretary YMA, Tuichangral 'S' Group pawhin lawmthu sawina hun a hmang bawk a. Pu H.Lalhruaitluanga PS to Minister in lawmthu sawiin he hun hi a khar a ni.