39/2023-2024

Tlabung the 5th April, 2023 - Rural Development Minister Pu Lalruatkima chuan vawiin khan Mizorama RD Block 28-na atan Tlabung RD Block a hawng. RD Block thar lawmna inkhawm hi Tlabung Rural Development Block Office Complex-ah buatsaih niin, Lunglei HPC Vice Chairman Pu Lawmawma Tochhawng chu khualzahawm a ni.

RD Minister hian Tlabung RD Block Office hawng nghalin Tlabung RD Block New Office building sakna tur lungphum a phum bawk a ni.

RD Minister Pu Lalruatkima chuan Mizoram history-a hmun pawimawh tak luahtu, Mizoram kawtchhuah hmasa Tlabung in RD Block an nei ta chu a lawmpui thu sawiin kum 30 chuang hnu zetah Mizoramin RD Block thar pahnih - Kawrtethawveng leh Tlabung RD Block-te kan nei leh thei chu thil chhinchhiah tlak leh hmasawnna ropui tak a ni, a ti a. RD Block thar neih chu thil awl ai lo tak leh harsa taka sual chhuah anih thu sawiin Minister chuan Mizoramah hmasawnna rualkhai a awm theihnan Sawrkar chuan thuneihna semzai leh kan ban phaka Sawrkar chhawpchhuah zel a tum a ni, a ti. Tlabung RD Block chuan Department hrang hrang hmalakna te a rawn keng tel dawn a, heng hmalaknate ti hlawhtling tur hian Block mipuiten kanlo thawhpui thiam a tul dawn a ni tiin mipuite chu tha taka sawrkar thawhpuia lo finchhuah thin turin a chah a. Mizoram RD Department chu ram pum huap pawha hna thawk tha an nih thu sawiin Department thawktu zawng zawngte thahnemngaihna leh inpekna avangin an chungah lawmthu a sawi a, Tlabung RD Block pawh a chhunga cheng mipuite tana hmasawnna thlentu leh mi harsa zawkten lei rem anlo rah ve theihna tura hnathawktu an nih ngei theihna turin duhsakna a hlan a ni.

He huna khualzahawm Lunglei HPC Vice Chairman Pu Lawmawma Tochhawng chuan Mizoram tana khaw pawimawh leh kan State ro hlu tam tak awmna Tlabung khua in RD Block an nei thei ta chu lawmawm a tih thu a sawi a. RD Block thar neih theih chu Mizoram pum, a bik takin Lunglei District tan hmasawnna ropui leh duhawm tak a ni tiin kawng hrang hranga hmasawnna thlentu leh rahbi thar thlentu anih ngei a beisei thu a sawi a. Tlabung chu khaw upa tawh anih angin a cheng mipuite pawhin rilru puitling tak an put a tul a ni tiin mipuite chu intodelh tum tlat tur leh a taka border trade kalpui anih hunah pawh mahni kutkawiha thil siam leh tharchhuahte hralh thei tura tun atanga lo inpuahchaha tan la turin a chah a. Tlabung leh a chhehvel khua te atana hmasawnna thleng mek leh ruahmanna awm mekte - RD Block hawn thar, NH 302 laih mek, MRB Branch hawn thar, Transport Department ruhrel ruahman mek, Border trade hmalakna, Inland Water Transport hmalaknate chhawr tangkaia hmasawnna tlo leh daih rei nei thei tura hma la turin mipuite a chah a ni.

West Tuipui bialtu MLA Pu Nihar Kanti Chakma pawhin thu sawiin vawiinah a bial chhunga RD block hawn a ni thei ta chu lawmthu a sawi a. Tlabung RD Block chu a chhunga cheng mipuite tana rahbi thar thlentu leh kawng hrang hranga hmasawnna thlentu a nih ngei a beisei thu sawiin mipuite pawh sawrkar thawhpui thiam turin a chah a ni.

Tlabung RD Block hawnna inkhawm ah hian RD Department official-te leh Lunglei District chhunga Department hrang hrang official-te, 163 Bn BSF hotute, tlawmngai pawl hrang hrang, khawtlang hruaitute leh mipui thahnem tak an tel a. Hawnna inkhawm hi Secretary, Rural Development Department Dr Lalzirmawia Chhangte chuan kaihruaiin, RD Deputy Secretary Pu Zoremthara Ralte chuan report a pe a. Lunglei DC Pi Ramdinliani chuan lawmthu sawiin hun a khar a ni.

Hemi hnu hian Licheng Field, Tlabung ah Joint Action Committee, Tlabung buatsaihin RD Block lawmna khawtlang inkhawm neih niin YMA, Young Pahadi Association, Young Bru Association, Young Chakma Association ten cultural item neiin hun hlimawm tak hman ho a ni.

March ni 25, 2022-a Council of Ministers thukhawm chuan Kawrtethawveng RD Block leh Tlabung RD Block siam tura rawtna lut chu a pawm a. Tlabung RD Block thar hi May ni 20, 2022 khan Lungsen RD Block leh Bunghmun RD Block atanga then hran niin Tlabung RD Block chhungah hian authorised village 17 leh authorised sub village 10 a awm a ni.

Tun dinhmunah RD Block Office bul tan tur hian BDO hmasa ber ni turin Mizoram sawrkar chuan Pu H. Zonunmawia, SDO(C) Tlabung a ruat a, MGNREGA atangin staff 16 (sawmparuk) an awm tawh a. Tlabung RD Block thar vil tur hian heng post - i.e. BDO-1, Assistant -1, Inspector of Statistics-1, UDC-1, LDC-1 IV Grade - 2 te chu dt. 7.10.2022 khan Sawrkarin a siam thar a, Block thar pahnih - Kawrtethawveng leh Tlabung RD Block te enkawl zuina turin Rs 66.42 lakhs chu Finance Department in ni 1.11.2022 khan a allocate bawk a. Tlabung BDO office thar, officer quarter leh staff quarter tur te tan ruahmanna pawh siam fel vek tawh niin a sak hna hi tan nghal thuai tur a ni.

Tlabung RD Block hnuaia khua awmte chu hengte hi an ni:
1) Tlabung
2) Tlabung Zodin
3) Chengkawllui
4) Diblibagh (Kawizau)
5) Tipperaghat
6) Khojoysuri
7) Nunsury I
8) Nunsury II
9) Silkur
10) Kalapani
11) Lamthai (Tablabagh)
12) Chawilung S
13) Tuichawng
14) Belpei
15) Malsury
16) Puankhai
17) Hmundo/Bandiasora

Authorised Sub Villages:
a) Muriskata
b) Ugdasury
c) Sugarbasora
d) Madhyasora
e) Serhuan
f) Bulungsury
g) New Balukiasury
h) Bindiasora
i) Devasora
j) Lokhisuri