754/2023-2024

2023 Nikir thla ni 10: Nizan (9.6.2023) khan Chawngtea CADC Art & Culture Hall-ah Chakma Autonomous District Council (CADC) hotute, official-te, khawtlang hruaitute leh tlawmngai pawlte pualin sikserh (malaria) chungchang leh a dona kawnga beihpui thlak dan tur zir hona hun buatsaih a ni a. Mizoram Sawrkara Health Minister Dr R. Lalthangliana chuan a hmanpui.

Health Minister Dr R. Lalthangliana chuan thu sawiin, District Council sawrkar thar chu hun kal tawh aia ṭhaa sawrkar kalpui turin duhsakna a hlan a. Malaria chu hriselna lama Mizoram dinhmun hnuk hniamtu pakhat a nih avangin nasa takin malaria dona kawngah ṭan lak a ngai tih a sawi a. Malaria vanga sum tam tak sen ralna leh thihna hial thleng ṭhin tibo turin mipui zawng zawng ṭan rual a pawimawh thu sawiin, mi tinin mahni theihna zawn ṭheuhvah theih tawp chhuahin malaria hi do a ṭul, a ti a. Ṭan rualna nen Mizoram aṭangin malaria chu um bo thuai theih a nih a beisei thu sawiin, sawrkar laipui leh state sawrkar hma lakna thlawp a, malaria um bo tura thawh hopuiah CADC sawrkar leh CADC huam chhunga tlawmngai pawl leh mipuite a sawm nghal a ni.

He hunah hian Lunglei South Bialtu MLA, Bamboo Development Board Vice Chairman Dr K. Pachhunga leh CADC Chief Executive Member Pu Rasik Mohan Chakma te bakah, CADC-a elected member-te, CADC leh state sawrkar official-te, khawtlang hruaitute, tlawmngai pawl leh kohhran ai awhte an tel a. CADC Chairman Pu Kali Kumar Tongchangya chuan inlawmna thu sawiin, State PH Consultant (VBD) Pi Malsawmthangi Pachuau chuan powerpoint presentation hmangin malaria chungchanga Mizoram dinhmun a tar lang a. Population aṭanga tehin Mizoram chu India rama malaria vei tamna ber state a nih thu leh Lunglei, Lawngtlai leh Mamit District-ahte malaria hi a hluar zual tih sawiin, Mizorama malaria do beihpui thlak tura ruahmanna leh hmachhawp hrang hrangte a sawifiah bawk.