2118/2023-2024

Khawzawl, 3rd October 2023: NABARD RIDF-XXVI sum cheng nuai 299.5 hmanga siam Chawngtlai Water Supply Scheme (Solar Pumping) chu vawiin khan PHE changtu Deputy Minister Pu Tawnluia chuan a hawng.

Hawnna inkhawm Nikuala Hall, Chawngtlaia neihah thu sawiin khuallian Pu Tawnluia chuan  Chawngtlai mipui ten tuilakna tha tak an nei  thei chu a lawmpui thu a sawi a, a hlawhtlin nan a hmalatu Department thawktute chu fakawm a tih thu a sawi bawk. Chawngtlai khua chu Mizo hnam zia leh nunphung chawi san leh vawng nun kawngah an entawntlak hle a ni, a ti a. He huna kalkhawmte chu mizo hnam thinlung pua ngaisang zel turin a chah.

Deputy CM chuan Mizoram sawrkar chuan ram leilung hmang ngeia intodelh tumin, chhungtin huapzo SEDP a kalpui mek a ni, a ti a. SEDP dawngtute chu pawisa dawn piah lamah a taka hnathawh ngaipawimawh turin a chah a, sawrkar hmalaknate thawhpui thiam zel turin a sawm bawk. Khuallian chuan Mizoram sawrkarin school 311 zet te chu dinhmun tha zawkah a hlankai thu tarlangin, heng zingah hian Khawzawl District chhunga school 15 an tel thu a sawi a. District chhunga thalaite hmasawnna in a tih lawm tak zet thin thu pawh sawiin, Khawhai VC Team ten Inter Village Volleyball Tournament-a champion nomawi an chawi chu hmasawnna ropui tak a ni, a ti bawk.

Khawzawl DC Pu K. Lalrohlua pawhin  he hunah hian thu sawiin Khawzawl District leh Tuichang AC bial chhunga hmasawnna hna rualkhai taka kal tirtu bialtu Deputy Chief Minister chungah District mipuite aiawhin lawm thu a sawi a. DoNER Ministry in khum 50 awmna tur Khawzawl Damdawiin sakna tur a pawm fel tawh thu te, Khawzawl Model High School-ah HSLC exam center thar neih a nih thu te, Chawngtlai Phai Veng Hall sa tura hmalak mek a nih thu te bakah Chawngtlai leh Tualte khua te chu cheng nuai 750 senna tur Pradhan Mantri Krishi Sinchayee Yojana (PMKSY) 2.0 hnuaiah thlan chhuah an nih thu te a tarlang bawk.

Chawngtlai Water Supply Scheme ( Solar Pumping) hi December ni 17, 2021 khan HS Construction ten an thawk tan a, November ni 16, 2022 khan hna hi thawh zawh a ni. Libial Kawr tui ni zung chakna hmanga lak niin, Solar Panel 60, 19.8 kWp a chak hmanga thuam a ni.  A pump-na hmun bakah khawchhungah hian  tui dahkhawlna litre 100,000 dawng siam a ni a. Chawngtlai WSS hi mihring 3,347 chawm zo tura ruahman a ni a, tun dinhmunah JJM kaltlangin in 394-ah tui pek mek a ni. Libial Kawr tui lakna bakah hian NABARD leh JJM hnuai atangin Chawngtlai tui  lakna  thin hmun pali - Zotui Kawr - Ngote kherh, Tuivamit - Venglai rin, Khawchhung tlang leh Vengthlang tuikhur - Phai Veng te chu pipe lian zawk 80mm a thlak vek an ni bawk.

Chawngtlai WSS hawnna inkhawm hi Er. Thanchungnunga, SE, PHED chuan kaihruaiin inlawmna thu a sawi a. Er. Eliza Vanlalpeka, SDO, PHED chuan technical report pein; Pu JH Lalremruata, Advisory Board Chairman pawhin thu a sawi a. Er. Liantluanga Chohte, EE, PHED in lawmthu sawina hun a hman zawhah inkhawm hi tihtawp a ni.