2117/2023-2024

Aizawl, the 2nd October, 2023 : Sports & Youth Services Department buatsaihin zanin dar 7:00 khan Mizorama Sports Awards 2023 & Incentive Cash Awards 2021-2022 & 2022-2023 semna hun Dawrpui Multipurpose Hall-ah hman a ni. He hunah hian Sports & Youth Services Minister Pu Robert Romawia Royte chu khuallian niin Pu TC Pachhunga, Vice Chairman, Sports & Youth Services, ICT and Tourism Development Board chu khualzahawm a ni.

Khuallian Sports & Youth Services Minister Pu Robert Romawia Royte chuan Mizoram Incentive Cash Award Scheme 2022 hman hnua a sem chhuahna hmasa ber leh Mizoram Sports Policy 2019 kentel Mizoram Sports Awards 2023 sem chhuah a nih theih nana theihtawp chhuahtute fakawm tiin, hamthatna leh lawmman dawngtute thinlung taka a lawmpui thu a sawi a. Hripui leng avangin kum 2021-2022 ah infiamna lama hmalakna a chawlh deuh thuap avangin infiammi 64 te chauh dan anga incentive cash award dawng thei an awm avangin kum 2022-2023 a incentive cash award dawng thei tura thlan mi 415 te nen a ruala sem chhuah a nih thu a sawi a. Incentive Cash Award chu Sports discipline hrang hranga che thate, duhsak bik awm lova dan tlawhchhana dik tak leh felfai taka thlan chhuahte an nih thin thu a sawi a; a hlut bikna chu infiammite theihna hriatpuina leh tihphur nana sawrkarin hamthatna a pek hi a ni a, a tam lam ai mahin a hlutna hi ngaihpawimawh zawk tur a ni, a ti bawk.

Sports Minister chuan sawi chhunzawmin, infiamna huang hrang hrang hnuaia intihsiakna lian tham, danin a pawmpui leh rintlaka tithate hnenah incentive cash award pek thin a nih thu sawiin, sports mi leh sate tihphur nan Mizoram Sports Awards duan chhuah a nih thu leh hemi hian infiammite leh anmahni buaipuituteah phurnna leh chona nasa zawk a pek ngei a beisei thu a sawi a. Mizoram sawrkar-in sports tihhmasawn a ngaih pawimawh thu leh hemi atana hmalaknate tarlangin Dan thar siam leh hmasawnna ruhrel chhawpchhuahte a sawi a. Sports department bikah budget tam lo mah se, hmasawnna ruhrel siam nan theihtawp chhuahin budget pawn lam Central sawrkar leh CSR atangtein hnathawhna tur sum thahnem tak hailuh a nih thu sawiin, hnathawh tawh leh tuna sanction neih sa thawh zawh a nih hnuah GST leh Labour Cess atangin Mizoram sawrkar sum bawmah chhiah nuai sing khat chuang chhunlut theih rin a nih thu a sawi a. Infiammi leh hemi lama theihtawp chhuahtute chu thlen china lungawi mai lova, tun aia hmasawn tuma hmalam pan zel turin a fuih nghal a. Sawrkarin Mizoram State Games 2024 ropui taka buatsaih a nih theih nan ruahmanna a neih thu a sawi a. Sports kalphung mumal tak hman mek a ni chu lawmawm tiin, hmasawnna a thlen zel a beisei thu a sawi bawk.

Khualzahawm Pu TC Pachhunga, Vice Chairman, Sports & Youth Services, ICT and Tourism Development Board chuan infiammite'n an thawhrah leh an kalzelna tura puitu tur Incentive Cash Award an dawng chu a lawmpui takzet thu sawiin, hemi ruala Mizoram Sports Awards 2023 sem chhuah a ni chu lawmawm a tih thu a sawi bawk a. Sports Minister hmalakna kaltlanga infiammite tana hamthatna leh chhawmdawlna sem chhuah a ni leh sports infrastructure engemawzat siam a ni chu lawmawm a tih thu a sawi a. Sports Department budget aia tam daih zawk hmasawnna ruhrel siamna tur sawrkar laipui atanga hmuh a nih thu sawiin, zirlai leh thalaite chu nun kawng hrisel, inthununna tha leh infiamna ngai pawimawh deuh deuh turin a fuih bawk.

He hun hi Dr. Lalrozama, IAS, Secretary, Sports & Youth Services Department chuan kaihruaiin  inlawmna thu a sawi a. Pu Lalnunhlua, Director, Sports & Youth Services Department-in report a pe a. Pu John Tanpuia, Secretary, Mizoram State Sports Council-in lawmthu sawiin hun hman hi a khar a ni.

Mizoram Incentive Cash Award Scheme kaltlang hian kum 2021-2022 chhunga incentive cash award dawngtu infiammi 64, sports discipline 10 atanga thlante hnenah Rs 20,20,750/- leh 2022-2023 chhunga Incentive cash award dawngtu infiammi 415, sports discipline 14 atanga thlante hnenah Rs 53,30,750/- sem chhuah a ni a. Incentive Cash Award hi 2021-2022 leh 2022-2023 chhungin infiammi 479 te hnenah pek a ni a, dawng nawn engemawzat an awm avangin mi hrang ang chuan mi 399 ten incentive cash award hi an dawng a. Avaiin Rs 73,51,500/- sem chhuah niin a dawng tam ber Lalhumhimi, Judo in cheng nuai 6 a dawng a ni.

Heng bakah hian Mizoram Sports Awards 2023, May 2022 atanga May 2023 inkara infiammi leh infiamna kaihhnawiha chethate Sports Awards hlan an ni a. Category 10 awmin category tinah hian nominee 5 zel awmin award dawngtute chu:
(1) Sports Person of the Year among Person with Disabilities Award: Nicky Chhakchhuak, Carrom (Rs 1,00,000 + Citation)
(2) Sports Promoter of the Year Award: LV Lalthantluanga, Zonet Cable TV Private Ltd. (Citation)
(3) Outstanding Mass Media for Sports Promotion Award: LPS Vision Production (Rs 1,00,000 + Citation)
(4) Coach of the Year Award: HC Zarzoliana, Football (Rs 80,000 + Citation)
(5) Most Promising Sportsman of the Year Award: H.Lalthazuala, Badminton (Rs 80,000 + Citation)
(6) Most Promising Sportswoman of the Year Award: Lalrindiki, Hockey (Rs 80,000 + Citation)
(7) Sports Team of the Year Award: 47th National Sub-Junior Basketball Championship, Mizoram Basketball Boys' Team (Rs 1,00,000 + Citation)
(8) Best Performing Sports Association of the Year Award: Mizoram Football Association (Rs 1,00,000 + Citation)
(9) Sportswoman of the Year Award: Lalremsiami, Hockey (Rs 1,00,000 + Citation)
(10) Sportsman of the Year Award: Lallianzuala Chhangte, Football (Rs 1,00,000 + Citation)