Rs. Nuaih 35 seng a NLUP Implementing Board in a siam Mizorama kuhva chiahna (Skop) hmasa ber Chemphai ami chu vawiin chhun khan NLUP Implementing Board Chairman Pu JH Rothuama’n a hawng.
Kuhva Skop-na hi “Kuhva Chingtu Co-operative Society, Bilkhawthlir” te hman tura siam niin a enkawl hna hi an kutah dah nghal a ni a, vawiina Kuhva Skop-na hawn inkhawm ah hian NIB Chairman chuan thusawiin Kuhva Skop-na an hawng thei chu a pawimawhzia hre turin Bilkhawthlir Kuhva Chingtu Co-operative Society member te a hrilh a, Mizorama a hmasa ber leh a bul tantu an ni tih inhre reng tura chahin reilote ah midangte pawh kawhhmuh tu an la nih dawn avangin Mizoram tan an thawk tel ani tih an inhriat a pawimawh ani a ti. Pu JH Rothuama chuan Mizorama kuhva tharchhuah te vairamah thla ruk vel an Skop a, Mizoramah an leina aia a let hnih/thum vela to in an rawn hralh leh thin hi a pawi a, kuhva chingtute hnamdangin an rawk nasa lutuk tih reh anih a, an thawhrim rah hlawk lehzuala an seng theihna tura kawng hawngtu anih ngei a beisei thu sawiin anmahni pui turin Sawrkar a awm reng a, a tlanchhe dawnlo tih a sawi bawk.
NLUP chungchang sawilangin mi thenkhatin NLUP chu hlawhchham lailet der ang hialin an sawi thin a, a hlawhchham leh hlawhchhamloh finfiah turin Zoram dung leh vanga NLUP hmalakna te fanpui turin an inpeih reng thu a sawi bawk.
Serlui Bialtu MLA Pu K.Lalrinthanga, Parliamentary Secretary pawhin thu sawiin kuhva Skop na siam anih theih nana Bilkhawthlir khua a mithahnemngaite hmalakna a fak a, Kuhva skop hi hlawhtling taka kalpui anih phawt chuan Zoram eibel pawimawh tak pakhat ani thei dawn a ni a ti a, NLUP Implementing Board chungah lawmthu a sawi bawk.
Kuhva Chingtu Co-operative Society, Bilkhawthlir te enkawl tur Chemphaia Kuhva Skop na hmun pumpui zau zawng hi a dung 180 ft, a vang 120 ft (1.5 bighas) a ni a, September, 2015 khan a hmun laihzawl niin hna thawh tan a ni a, July 2016 khan sak zawh niin India ram State hrang hrang a kuhva skop na zirchian anih hnu a a tha lai lai lakhawm a siam anih bakah Bilkhawthlir a kuhva chingtuten tha an tihdan thurawn lak tel a ni bawk. Kuhva skop na a hman tur tui hi kilometer 1 vel a hla ami Gravity a lak a ni a, plastic pipe 40 mm hmanga lak thlen niin a dahkhawl nan Tuizem lian tui litre nuaih khat dawng siam a ni a, kuhva chiahna tura siam RCC tuizem ah 65 mm GI pipe hmanga semdarh leh a ni. Kuhva chiahna RCC tuizem hi pathum siam niin 40 ft x 20 ft a zau, 6 ft a thuk theuh an ni a, zem pakhatah hian kuhva pum nuaih 7 vel vawikhatah chiah theih anga chhut a ni a, a vaiin vawikhatah kuhva pum nuaih 21 vel chiah theih tura ruahman a ni a, tuizem tinah hian a hranpa in tui luh tir anih bakah tui hi luang chhuak thei tura siam a ni bawk. Hei bakah hian a hmun vengtu leh enkawltu riahna tur tha takin sak ani bawk. Kuhva chiahna tuizem hi a tul dan anga zirin panga la siam belh leh theih tura ruahman ani bawk.
Kuhva Chingtu Co-operative Society, Bilkhawthlir hian a enchhin nan kumin April ni 17 khan Kuhva 32,000 an skop chhin a, heihi vawiinah lakchhuah niin mithiamten uluk takin an endik hnu ah kuhva skop zinga grade tha ber anih thu an sawi a ni.
Vawiin Kuhva Skop-na hawn inkhawm hi Pu James Lalnithanga, Secretary, NLUP Implementing Board in a kaihruai a, Pu Ronald Lalchhuanawma, Marketing Task Force Member in keynote address pe in Er. Laltluangkima, Project Engineer, NIB in Technical Report a pe a, Pu T. Rohluna, Vice-President, Kuhva Chingtu Co-operative Society, Bilkhawthlir in thu a sawi a ni.
