Soil & Water Conservation Deptt. Hnahthial hmalakna a Rs. 3,42,050 senga Darzo kai Tuipui 'D'-a Marboat Pick-up full load thiarkai theihna tur chu vawiin khan Pu John Siamkunga, MLA Chairman Mizoram State Law Commission chuan mipui hnenah a hlan.

Pu John Siamkunga chuan tui rala mite harsatna te hriain bial mipui te,  sorkar hnathawk te, V/C hrang hrang te nasa taka tangtlanga hma an lakna ah chuan rah tha tak hmuh theihin a awm ta a ni a ti a, tui rala mite leh mipuite inkalpawh zung zung theih nana tangkai tak tur Marboat mipui hnenah hlan a ni ta chu a ropuiin a lawmawm hle a ni tiin Tui rala mite mangan thin zia hria a bial mipuite tan tlanna a he lawng hi lo puitling ta a nih thu leh a bik takin Soil Deptt. in theih tawpa an tanna zar a ni tiin he lawng hi tun atang chuan he lai kalkai duh zawng zawngte'n tangkai taka an hman turin lawm takin a mipuite hnenah  hlan a ni ta tiin lawmthu a sawinawn leh.

Hlanna inkhawm Tuipui 'D' Marboat-a neih-ah Pu K. Lalrinawma, President Tuipui Ral V/C Association chuan kaihruaiin Pu George Lalromawia, Director S&WC Deptt. pawhin hmanpuiin thu a sawi bawk a, Pu V. Vanlawma Divisional Officer S&WC chuan Technical report pe in lawng sak nan hrim hrim hian Rs. 2,70,550 hman a nih thu leh hemi bakah engine 2, 9 horse power lei nan Rs. 70,000 leh accesories dang lei nan Rs. 1500, avaiin Rs. 3,42,050 hman a ni thu a sawi a, lawng hi 2 zawm niin lawng pakhat len zawng hi a dung 30ft, a vang 7ft leh a san zawng 2.10ft a ni bawk.