No.1925/2020-2021

Vawiin khan Health & Family Welfare Minister Dr. R. Lalthangliana hovin a pisa ah COVID-19 chhunga mipuiten rilru hrisel an neih theihna tura din Committee on COVID-19 Psychological & Social Guidance leh Mental Health on COVID-19 Team te an thukhawm a, an hmalakna bakah Mizoram dinhmunte an thlirho.

Health Minister chuan COVID-19 in Mizoram min delh rih tak tak hun a ni mekin a lang a, hetih rual hian COVID-19 vei kan neihte dinhmun ngaihtuawm lutuk an awm rihlo a, reilote ah damchhuak kan neih chhoh nthuai a beiseiawm a ni a ti a, hetih rual hian kai thar kan la nei reng hmel thung a, hetiang boruak karah hian mipuite leh quarantine a awm mek ten rilru hrisel leh hahdam kan neih a pawimawh em em a, hemi atana Psychological & Social Guidance leh Mental Health on COVID-19 Team te hnathawh tawh chin a chhuanawm hle a ni a ti.

Thu belhchian dawllo leh thuthang leng vak mipui ti chi-ai thei thehdarh kawngah mipui kan insum a ngai tih thu sawiin Chennai atanga lo haw Tamil Nadu a Mizoram mi leh sa tangkhangte, quarantine hun zo tawh a chhuah zalente chu fimkhur thuhla ah Mizoram sawrkarin swab sample laksak a RT-PCR a test turin a chhui mek a, a chanve vel an thawk zo tawh a ni, a ti a. Hemi chungchangah mipuite a hlauhthawnna a awm ni a lang chu Health Minister chuan sawrkarin a tih tur a hria a, sawrkar hmalakna a rintlak tawk a ni tih a sawi a, thlaphang lo turin mipuite a chah a ni. Tunah hian ZMC laboratory ah Automated RNA Extractor pahnih chu a hman theih dawn hnai niin a lang a, enchhinna pawh uluk taka kalpui mek a ni, a ti a, Haua & Sons ten sum an thawh hmanga lei RT-PCR khawl pawhin vawiin hian Aizawl a rawn thleng tih a sawi bawk.

Health Minister chuan COVID-19 vanga thla thum chuang zet nunphung a khaihlak chhunga Mizoram mipui, pawl hrang hrang, NGO leh task Group-te, sawrkar hnathawk leh VLTF leh LLTF te bakah tunhnaiah a bik takin ZMC Laboratory a thawktute an hah em em a, an thawhrimna leh inpekna zawng zawng ah lawmthu ka sawi a ni a ti a. he hrileng hi ze danglam tak nei a ni a, hmachhawn dan pawh thiam a har hle a ni, tiin an hmalakna kawng hrang hrangah tihsual palh leh mipui leh pawl hrang hrangte duhthusam leh beisei kan phaklohna tam tak a awm ang tih ka ring a, hengah te hian in hriatthiamna leh ngaihdamna ka dil a ni, a ti.

Committee on COVID-19 Psychological & Social Guidance leh Mental Health on COVID-19 Team te chuan Government Quarantine Facilities leh Community Quarantine Facilities an tlawh thin thu te leh quarantine mekte nen pawh hunt ha tak an hman thin thute an sawi a, mass counselling an tih bakah mamawh zualte tan mimal/private counselling an tih thin thute, mipuite zirtirna TV show leh thuziak bakah poster an siam thin thute, Quarantine centre a awm naupang ho intihhlimna tur an ruahman thin thu te an sawi a, Quarantine mekte harsatna tawh zirchianna turin questionnaire an siam thin thu an sawi bawk. Quarantine Facilities chungchangah Sawrkar inbuatsaihna a tha tawka an hriat thu an sawi rualin quarantine a awm mekte tana hrehawm leh hriat nuamlo, an rilru hrehawm tawh sa belhchhah tura pawn lam atanga social media kaltlanga thu leng vak awm thin chu pawi an tih thu an sawi lang bawk a, home quarantine a awm mekte nen in dawrtawn dan tur ngaihtuah tula an hriat thu an sawi bawk. Hei bakah hian ruihhlo ngaite chungchang pawh sawiho niin COVID-19 vanga harsatna awm thei hrang hrang an sawiho bawk a ni.