No.1924/2020-2021

Aizawl, the 11th June 2020: Green Mizoram Day vawi 22-na pualin vawiin khan City Forest, Hlimenah Environment, Forests & Climate Change (EF&CC) Department buatsaihin mi sawmbik te’n thing phunna hun an hmang a, EF & CC Minister Pu TJ Lalnuntluanga leh Aizawl South – III Bialtu MLA Pu F. Lalnunmawia ten an hmanpui a ni.

EF & CC Minister Pu TJ Lalnuntluanga, Minister chuan, ”Kan hripui do mek do hneh dan tha ber chu taksa tih chak a ni a, taksa chak tur chuan boruak thianghlim a pawimawh a, boruak thianghlim nei tur chuan thing phun belh zel a ngai a ni” a ti. Ramngawte hi khawvel tan chuap ang an nih thu sawiin minister chuan Forest Department chauh ni lo NGO te leh environmentalist tam takte avanga ramngaw leh nungcha humhalhna kawnga hma kan sawn zel avangin lawmawm a tih thu a sawi bawk.

He hun hmanpuitu dang Prof. Mawitea pawhin a bial chhunga Green Mizoram Day pual thingphunna hun hman a ni chu lawmawm a tih thu sawiin thingphun mai bakah ramngaw leh nungcha humhalhna kawngah a bial mipuite tihhmuhtu a nih ngei beisei thu a sawi bawk.

He ni pual vek hian Pu Lalnunmawia Chuango, Chief Secretary chuan Cherry Blossom avenue, MINECO ah thingtiak a phun bawk.

Green Mizoram Day hi kum 1998 khan ‘Green Aizawl’ tih hmingpuin tan a ni a, a kum leh 1999 atangin ‘Green Mizoram’ tih ni zuiin kumtin hman thin a ni a, sawrkar department te leh mipui ten a hu hova thingphunna hun atan an hmang thin a, mimal leh pawl ho tan thingtiak chi hrang hrang a thlawn a sem chhuan thin a ni bawk. He programme hnuaiah hian nikum thleng khan thingtiak 16,46,289 zet hnatlanga phun tawh niin 22,35,963 zet mimal leh pawlho hnenah semchhuah tawh a ni bawk a, phun zawng zawng leh semchhuah zawng zawng hi avaiin 38,82,252 zet a ni tawh.

Green Mizoram day vawi 22-na hi COVID-19 hripui avangin kum dang anga hman theih ni lo mahse District leh Forest Division hrang hrangah DC leh DFO te ruahmannain a theih ang anga thingphun programme buatsaih a ni a, a duh apiang tan thing tiak a thlawnin an sem hlawm bawk.

Hripui avanga kumin Green Mizoram Day duh anga hman theih a nilo chu pawi an tih thu EF&CC Department hotute chuan sawiin, lockdown zawh veleh social distancing zawm chunga thingtiak pakhat tal phun theuh turin mi zawng zawng an sawm bawk.

City Forest, Hilimen rama Green Mizoram Day thingphunna hun puala function tawite buatsaih hi Pu Kawlhnuna IFS, DFO Aizawl chuan a kaihruai a. Forest Minister Pu T.J Lalnuntluanga, Pu F. Lalnunmawia, bialtu MLA te bakah Dr. CHM Rao IFS, PCCF & Principal Secretary, EF&CC te, Pu Liandawla IFS, PCCF & Chief Wildlife Warden te bakah sawmbik te’n thing tiak 18 an phun a ni.