Vawiin khan Art & Culture Minister Pu P.C. Zoram Sangliana hovin a pisa ah Organising Committee on Mass Bamboo dance in Cheraw(Bamboo dance) hmanga Mizoram in Guinness World Record a siam chungchang thlirletna hun an hmang.

He thlirletna hunah hian hun rei tak atang tawha Art&Culture Department in a lo thlir lawk tawh angin hlawhtling taka Mizoram in Guinness World record thar ni 12.03.2010 a siam a ni ta chu lawmawm an tih thu Organizing Committee thukhawm chuan an sawi a. Sub Committee peng hrang hrang 10 - Traffic Management & Security, Bamboo Collection, Medical, Costume, Transportaion & Reception, Documentation & Publicity, Identification of Venue, Water & Sanitation & Technical Committee leh Light & Sound aiawh ten report tawi an pe theuh a ni. A pumpui a sum sen cheng nuai 50 hmanralna pawh Committee ah hian pharh a ni.

Inkhawm kaihruaitu Minister Pu P.C.Zoram Sangliana chuan he World Record hlawhtlinna tur atana sum leh pai leh tha leh zung seng tu zawng zawng chungah Organising Committee in lawmthu a sawi takzet a ni a ti a. Heng hlawhtlinna bul ber chu Finance changtu  Chief Minister Pu Lal Thanhawla'n mimal taka a phurpuina vang niin ama chungah hian Committee chuan lawmthu a sawi a ni a ti. Hetianga khawvel hriat a Mizoram leh Mizo ten hmingthatna ropui tak a hlawh tak avang hian October thla a Commonwealth Games hawnna hun hman turah pawh Cheraw kan tur a sawmna hmuh a nih dan sawi chhuakin Minister chuan hei hi phur tak a kalpui niin thalai 80 rual Delhi khawpuiah tirh an ni dawn a ti bawk.