Vawiin atang khan Champhai mipuite nghahhlelh em em Chhangphut Field a Artificial Grass phah tur chu bul tan a ni ta.
Vawiin khan he hna thawktu tur Lushai Engineers atangin Engineer pahnih, Michael C Lalmuanpuia leh C Lalbiaksanga te an kal a, CDF A hotute nen Chhangphut field chu chawhma lam khan a hmunah kalin hna thawh dan tur leh an lung duh angte an enfel a, chhun dar 12 khan Champhai District Football Association hruaitute nen Pu Hualrikhuma, President CDFA Office Chamber ah, Chanchinbu mite nen inkawmhona an nei a ni.
He hunah hian, Senior Vice President Pu Lalnunmawia chuan, mi tam takin hna tan ala nih mai loh avangin Election Propaganda angah an ngai a, chutiang anih loh zia tilang turin vawiina hna an tan chu lawmawm atih thu a sawi a, Engineer te chu tha thei ang bera siam sak tura ngenin, Aizawl tlang atanga Champhai mi leh sa ngei ten an siam sak tur chu lawmawm a tih thu sawiin, hna bul tan ni atangin Champhai mipui an phur em em a, theihtawp chhuah sak turin a ngen a ni.
He hunah hian Er. Michael C. Lalmuanpuia pawhin thu sawiin, hna bul tan tir kan ni a, chuvangin thawhchhiat kan duhlo a ni a ti a, hna dang kan lo thawh tawhna ah pawh kan naute mak tih khawpin kan uluk thin a ni ti a, July ni 16 khan siam tur anih thu Order a chhuak a, August ni 19 ah Work Order an hmuh thu a sawi a, khaw awmdan in a zir loh avanga hma la tan thei lo an nih thu a sawi a ni.
Champhai Chhangphut Field a Artificial Turf phahtu turte hi Lushai Engineers, Construction & Consultancy Company an ni a, anni hian Italy Company Limonta an thawhpui dawn a, tunah hian an hnathawhna tur khawlte pawn rawn kalpui mek a ni a, Mizoram hmun danga Artificial turf phah tawh te hi an siam lai khan FIFA Approved an la nilova, hemi vangte hian an field siam hi International Standard a ni lo tih Lushai Engineers hotute chuan an sawi.
An thawhpui tur Limonta Company te hian AC Milan, Ajax te bakah khawvela Stadium langsar te pawh an lo siam tawh a, hei bakah hian North East ah pawh experience 16 nei tawhin, tunah nan One Star emaw Two Star emaw a siam an tum thu an sawi a, Champhai Chhangphut Field hi Mizoram a FIFA Certified Field hmasa ber tur a ni a, chutiang an thawhpui thei tur chu an lawm hle thu Lushai Engineers hotute chuan an sawiin Chhangphut Field hi an ruahman dan chuan a vang Metre 75 leh a dung metre 110 a siam an tum thu an sawi .Tuna an inrem siam dan chuan thla thum chhunga thawh zawh tum anih thu an sawi a. Mahse, khaw awmdanin a zir loh avangin hna thawh chak a har an rin thu an sawi tel bawk.
