3037/2023-2024

Khawzawl, 14th December 2023: Chhawrtui khua, Khawzawl District chuan meimit lova khua an luah champha kum sawmngana lawmna leh khaw chhuak hawrunpui December ni 12 atanga an hman tan chu vawiin khan Chhawrtui Community Hall-ah an hman chhunzawm a. Khawzawl Bawrhsap Pu K. Lalrohlua chuan he hun hi khuallian niin a hmanpui a, cheng nuai 10 senga sak Chhawrtui Village Council House a hawng nghal bawk.

Khuallian Pu K. Lalrohlua chuan Chhawrtui khuain meimit lova kum sawmnga khua an luah champha an thleng thei chu a lawmpui thu a sawi a. Khawzawl District-a khaw dangte ang bawkin Chhawrtui chu khaw fai leh nuam tak a ni, a ti. India ram chu kum 2047-ah ram changkang/ hmasawn tawh (developed country) ah hlankai ngei tumin sawrkarin hma a lak mek thu pawh sawiin, he tum ram (Viksit Bharat) India-in a thlen ngei theih nan khawtlang mipuite chu taima taka hna thawka, faina bakah dan leh thupek zawm kawngah te tan la turin a chah a. Chhawrtui khua chu Mizo Lal ropui Lalburha khua a nih angin, an lal chanchin leh khaw chanchin te thehdarh kawngah tan la turin kalkhawmte chu a sawm bawk.

Bawrhsap hian zirna kawnga Khawzawl District hmasawnna pawh he hunah hian tarlangin - Khawzawl khawpui chhunga HSLC exam centre pakhat sikul 12 zetin an intawm thin tiziaawm turin exam centre dang - Model High School-ah neih belh a nih thu a sawi a. Sawrkarin Chhawrtui High School dinhmun tha zawka a hlangkai ta chu a lawmpui thu sawiin, kum hmasa lam aia result tha zawk neih tum turin zirlai leh zirtirtute a chah a ni.

Inkhawm hi Pu K. Vanhnuna, Vice Chairman, Golden Jubilee Organising Committee in a kaihruai a. Khualzahawm Pu C. Vanlalzawta leh Chhawrtui Khawchhuak Welfare aiawh ten thu sawiin, Pu Lalmuanzova, Finance Secretary chuan lawmthu sawina hun a hmang a. Zaithiam leh hnam lam ngaihnawm leh hmuhnawm tak tak thlir ho a ni bawk.

Chhawrtui khua hi Mizoram khawchhak lam, Aizawl - Champhai kawng, Kawlkulh atanga chhim lam 17 km-a awm a ni a, Lalburha khan a tumkhatna atan kum 1903 khan Chhawrtui hi a kai a. Kum 1968 khan rambuai avangin Khawhaiah sawikhawm an ni a, kum 1973 khan khaw hluiah an let leh a, kum 2023 hi meimit lova khua kum sawmnga an luah champha a lo ni ta a ni.

Vawiina hawn tak Chhawrtui Village Council House ( Panchayat Bhavan) hi Rashtriya Gram Swaraj Abhiyan (RGSA) hnuaiah cheng nuai 10 senga sak a ni a. Chhawng hniha sang niin chhawng khat hi feet 24 x 12 a zau a ni.