Home Minister Pu R.Lalzirliana chuan nimin, October 27 khan Saitual Badminton Indoor Stadium,Saitual leh Saitual Forest Rest House, Keifang ami te a hawnna ah sawrkar hnathawk leh mipui pawisawi lo te vau beta chhiah tuklui thin helpawl te khawsak dan chu sawrkarin a huat takzet thu leh heng kawhmawh bawl hmang te hi zawn chhuaha hrem an nih tur thu a sawi a. Vauna tawk thin sawrkar hnathawk leh mipuite chu hel thil phut hrang hrang te huaisen taka ti hlawhchham sak thin tur leh an thlavang hauh theihtu, sawrkar hnenah a rang lama chanchin hriattir nghal thin turin a chah a ni.

Home Minister Pu R.Lalzirliana chuan Sawrkar hmalakna hrang hrangah a tak a thawktu Sawrkar hnathawkte an rinawma, an taihmak phawt chuan mipui nen thawhhonna tha awmtirin ram in hma a sawn bakah ram hruaitute hming pawh a tha thin a ni a ti a. Sawrkar hnathawkte chu eiru thei leh eiru lo thei, hmalakna sum tlem deuh zawkte pawh an tum phawt chuan tangkai taka hmang thei leh thawktu indaihlohna tam zawk pawh remhriatna leh taihmakna ching fel thei a ni a. Hna tha taka an thawh theih nana pawimawh ber chu inpekna, rinawmna leh taihmakna a ni a ti. Hel ho vauna avanga mahni hna pawh thawk ngam lo sawrkar officer-te an awm ta zeuh zeuh chu hel laka sawrkar tih thangtlawmna a nih avangin sawrkar lawm zawng a ni lova, ram leh hnam tan, huaisen takin kan tihturte hlen chhuah theuh kan tum zawk tur a ni a ti. Tunhnai deuh atang khan hnathawk peih lo leh kawhmawh bawl hmang ten hel pawl ah inchhalin sawrkar hnathawk leh mipui hnenah tukluih chhiah khawn in ei an zawng thin tih hriat a ni a. Hei hi Sawrkar thil huat ber, pawikhawihna nasa tak a nih avangin heng misualte hi hrem lohva chhuah an ni lovang a ti. Mipui vaubeh tawktute pawh an huaisenna sawmkhawm in helho thil phut tih hlawhchham sak thin turin a chah a, buaina an tawhin a hunlaia sawrkar hnena thlen thuai thin turin a chah a ni. Forest Rest House a hawnna ah Home Minister chuan amah ngei pawh ram vaka sa kap thin a nih thu te leh ramngaw leh nungcha humhalh kawnga a pianthar dan te a sawi a. Mizoram chu ramsa tamna leh an rawn pem luhna thin a ni a,tunah erawh chuan an eitur theirah leh thingkung par thinte an chereu miau avangin rawn kal leh nachhan tur an nei tawh lo a ni a ti a. Ramngaw kan siamthar leh mek ah hian thing rah leh par chhuah thin ramsa leh sava te tlan duhzawng a tam thei ang ber kan phun leh a ngai a. Thangtharten silai hmang tawh lova Thlalakna nena sava leh nungcha te veh an intihhmuh tawh laiin rual u zawkte silai nena la vak chhuak thin ten an silai te an tun a hun tawh a ni a ti.

Nimina hawn tak Saitual Badminton Indoor Stadium hi adung feet 75, a vang feet 70 leh a sanzawng feet 28 a ni a.10% Lumpsum Grants for North Eastern Region kaltlanga Slum Area Development Project for Saitual town UD&PA Department in a siam hmanga sum hmuh Rs.55,13,151/- seng a NBCC Ltd. hnuaia thawk contractor in a sak a ni. he stadium, badminton court awmna hian a chhuat ah thingphel phah a hman bakah ah hall chhungah hian inthiarna leh green room sak tel a ni. Indoor chhung tih enna atan electric lighting units a thawh bakah inkhel entute thut nan leh a tula hman atan plastic chair 500, bialtu MLA ni bawk, Home Minister hian Saitual Badminton pawl hruaitute a pe bawk a ni.

Forest Rest House, Keifang hawnna programme hi Addl. PCCF Pu Rosiama Vanchhawng in a kaihruai a. He khualbuk hi 13th Finance Commission atanga Environment & Forest Department in Financial year 2012 -2013 chhunga Rs. 20 lakhs a dawn hmanga a sak a ni a. A lenzawng hi a dung feet 43 leh avang feet 32, chhawng khat a sang a ni a. A chhungah hian VIP room khum 2 (pahnih) awmna, mikhual pindan khum 2 (pahnih) ve ve awmna 2 leh choka te a awm a. He khualbuka thlen tum chuan Saitual Forest Range Officer hnen atang in phalna lak hmasak a ngai a ni. Thlen man ah General Administration Department in khualbuk thlen man a biktuk ang hman a ni.