Chhiah hi mipui ten kan inenkawlna atana danin a phut anga kan pek, kan zavaia that tlanna atana hman a ni a, chhiah pek tum lo mi chuan a chenna ram a hmangaih lova, ram nei tu tak tak thinlung a pu thei thin lo, Finance Minister Pu H. Liansailova chuan a ti. He thu hi vawiina Taxation Department Officer ten Aijal Club-a Meeting an neih a hmanpuina a a sawi a ni.

Finance Minister chuan khua leh tui ten chhiah chi hrang hrang pek hi kan tih makmawh, keimahni tan bawka hamthatna ani tiin chhia pek kawnga rinawm chuan chhiah petu, khua leh tui dik tak te chanvo pawh an hre chhiang bik a ni, a ti a. Mipui sum ti chingpen an awm pawhin chhiah petu mipui ten na tak leh awmze nei zawkin an do tlang thei ang, a ti. Pu H. Liansailova chuan Taxation Department chu hna pawimawh tak thawk tu niin kum kal ta chhunga an hnathawh te en leta kum kal meka an hmalakna turte thlirlawka Meeting pawimawh an nei thei chu fakawm a ti a. Mizoram pumin Tax Revenue 2011-2012 chhunga hmuh beisei atanga tehin Taxation Department in za zelah 83 chuang a khawn a, Taxation Department hian a thawhhlawk hle a, amaherawh chu Mizoram sum mamawh pumpui atanga teh chuan a la bei tham hle a, hmasawnna tur tam tak a la awm a ni, a ti bawk.

He meeting a tel ve Taxation & Finance Secretary Pu Vanlalnghaka pawhin Taxation Dept. a thawkte fakin ram pumin 2010-2011 chhunga tax hmuh zat thanna, growth rate 17% vel a beisei laia Mizoramah 30% aia tama a pung thei chu lawmawm a tih thu a sawi.

Kum 2011-2012 chhung khan Taxation Department hian chhiah chi hrang hrang- Sales Tax/ VAT, Profession Tax, Entertainment Tax atangin cheng vaibelchhe 145.95 hmu tura beisei an nih laiin cheng vaibelchhe 149.49 an hmu a, an target hi cheng nuai 354 zetin an khum a ni. Nikum sorkar kuma an chhiah khawnkhawm kha kum hmasa, 2010-2011 sorkar kum chhunga an chhiah hmuh aiin za zelah 30-in a punga, chhiah an khawnkhawm tam ber kum a ni bawk. Department lam inchhut danin cheng khat khawn nan pawisa paruk hmang ang an ni. Kum 2012-2013 hian an target chu cheng vaibelchhe 170.27 a ni.

Value Added Tax leh Central Sales Tax kenkawhnaa hman atan Computer software thar ‘VATSoft’ duan a ni a, Department Website ‘www.zotax.nic.in’ pawh tax chungchang leh a kaihhnawih hre duh tan tlawh theih reng a ni. Chhiah petute awlsam zawk nan internet kaltlangin e-Registration, e-Way Bill, e-Returns leh e-Payment te a pek theih tawh a, internet nei lo te tan pawh ‘Dealers’ Facilitation Centre’ Aizawl khaw chhung hmun 10 leh District Headquarters tinah 1 theuh hawn tum a ni bawk. Department-in authorized service provider te hnenah Facilitation Center hawn phalna a pe anga, heng Centre-ah hian fee tlem te pein dealer-in a return submit tur te, a tax pek tur te online-in a tihtir thei anga, form chi hrang hrang a lak duh pawh Taxation Office a kal kher ngai lovin a la thei zel tawh ang. Hmarchhak State te zingah Mizoram Taxation Department hi he project hmang tangkai chak ber leh nei changtlung ber a ni tawh nghe nghe.

He Meeting kaihruaitu Commissioner of Taxes Pu Lalthangliana Varte chuan kum kalta chhunga an hnathawh thlirkirna hun a kaihhruai a. Chawhnu lamah an service association MITSA puala hun hman zui a ni a, 2012-2013 chhunga an hmalakna tur hrang hrang te, an Service chhunga hamthatna leh mamawh hrang hrang an neih sawihona te leh hruaitu thar thlanna an nei zui nghal a ni.