Vawiin khan Mizoram Taxation Service Association(MITSA) member te inhmuhkhawmna hun Aijal Club a buatsaih ah Taxtation Minister Pu Lalsawta chuan chhiahpetute chu dah pawimawh an tul thu te leh an hriatthiam loh te hrilhfiah tura Taxation Department a thawkte mawhphurhna te a sawi a. Sawrkar chuan mipui tan leh ram inrelbawlna hnathawk turin mipuite chhiah tling khawm a mamawh thu sawiin mipui leh sumdawngte pawh chhiah pek chungchangah Sawrkar hmalakna te thlawp thin turin a ngen a ni.

Taxation Minister chuan Department dangte anglo takin Taxation Department chuan mipui hnena sem chhuah lam ni lovin, mipui chhiah pek tling khawm sumdawngte hnen atanga lakhawmtu a nih avangin lawm pawh a hlawh teh chiam lo a ni a ti a.An hnathawh ah hreawm tih chang pawh an nei thei ang a, ram hmasawn nana thawk an ni tih an inhriat chhuah erawh chuan lungawina leh hlimna an nei dawn a ni a ti. Taxation Department tel lo chuan sawrkar hman tur, inrelbawlna sum a lo awm ringawt thei lo a ni a ti. Chhiah leh kawng dang atanga sawkar sum lut a pun zel theih nan mipui leh sumdawngte thlawpna a pawimawh thu sawiin Taxation Department a thawk te pawhin hawihhawmna nen thawk chunga chhiah petute hriatthiam loh lai te hrilhfiah zela remchanna an zawnpui te a ngai a ni a ti. Ram ropui taka hruaitu ropui thusawi pakhat - "i ram in i tan enge a tihsak che tih aiin i ram tan enge i tih theih in zawt zawk rawh" tih te kha a tak a kan nunpui a ngai a ni a ti a. Kawng tinrenga sawrkar phut vek lovin ram hmasawnna tur a nih phawt chuan kan tih theih tawka rinawmna nena tan kan lo lak ve a ngai a ni a ti. Ram ropui leh khawpui nuam tak tak kan hmuh leh hriatte kan sawi thin a. Hetianga Mizoram siam ve tur hian mipui leh sawrkara thawk zawng zawng pawhin chung ram nuama cheng mipuite inpekna, thawhrimna leh an insenso na te kan hmuh chian ve phawt a tul thu a sawi a. Sawrkar, in tam lian tak leh a hnathawktute enkawlna atana in sengso nasa (big goverment), mipui tana thawk tlem leh si(small governance) nih ai chuan sawrkar te, mipui tana thawk hlawk tak si nih kan tum a ni a ti. MITSA General meeting programme hi hun hnih ah then niin an pawl President Pu Kailiana Ralte in a kaihruai a. Meeting hawnna in khawm neih zawh ah MITSA office bearer thlanna leh rorelna hun hman a ni.

MITSA General Meeting programme ah hian Commissioner of Taxes Pu Lalthangliana Varte pawhin thusawina hun a hmanga, Taxation Department a thawk te tan hawihawmna a tulna te, Information Technology thiam a ngaihna chhan te leh tax system hman mek te bel taka thiam ngei ngei a pawimawhna te a sawi a ni. Tuna hman mek tax system hi kan hma lawk hian 'goods & Services Tax(GST)' in a rawn thlak tur thu tarlan a ni bawk a ni.