Vawiin khan DIC Conference Hall, Lunglei-ah Industry Sector hnuaia NLUP 2nd Phase 2nd Installment Tailoring Trade thlangtu mi 41 hnenah tanpuina sum Rs.30,405/- chu Lunglei HPC Vice-Chairman Pu S.Laldingliana'n a sem a ni.

He NLUP tanpuina semna inkhawm hi General Manager, DIC Lunglei Pu Lalnuntluanga kaihhruaiah Khuallian Pu S.Laldingliana chuan NLUP tanpuina dawngtu zingah Tailoring thlangtute an vanneih bera a hriat thu a sawi a, 3rd Installment dawng leh thei tura inbuatsaih chho turin a chah bawk a ni. Mi harsate, mahnia dingchhuak thei lo ten lei rem an rah ve theihna turin sorkarin NLUP a ruahman a; sorkar chuan a tihtur a ti zo mek a, tanpuina dawngtute zawkin an tih tur dik tak an ti a, rinawmna leh tumruhna tak tak nen hlawhtling ngei tura an bei chu an bat a ni thung, a ti. Vawiina tanpuina dawng zawng zawngte chu a lawmpui thu sawiin an chhungkua theuhte dingchhuak theih ngeina turin duhsakna a hlan a ni.

NLUP Tailoring Trade hnuaiah hian Lunglei district atan pawisa semchhuah tawh zawng zawng hi Rs.12,46,605/- (Cheng nuai sawmpahnih singli sangruk zaruk leh panga) a ni. Heng beneficiaries 41 te hian puanthui khawl tha tak tak - ke khawl, over-lock leh embroidery machine - an dawng theuh tawh bawk a ni. Puanthuikhawl nei tawh sa pawisa faia dawng tur mi 22 te pawh pek thuai an nih theih nan hmalak mek a ni.

Khuallian HPC Vice-Chairman Pu S.Laldingliana hi Pu Zathangliana, District NLUP Coordination Officer; DIPRO Pi Mina Zoliani; Pu Zosangliana, Editor, Calathea (Hnahthial) leh Lunglei 'S' Block President Pu Zodingliana ten an tawiawm a ni.

Attachment

  • Loading attachment...