Sawrkar Laipui ruahmanna thar “Saansad Adharsh Gram Yojana (SAGY)” , MP Model Village ti a hriat ni bawk kaltlanga Rajya Sabha MP Pu Ronald Sapa Tlau-in model village siamna atana a thlan Chhiahtlang khua a an Community Hall-ah vawiin khan SAGY chungchang inzirtirna leh inhrilhhriatna hun hman a ni a, Chhiahtlang mipui thanem tak telin State Institute of Rural Development (SIRD) Director Pi Maria C.T. Zuali, MCS leh faculty member ten he hun hi hmanpuiin zirtirna an pe a ni.

Serchhip District Bawrhsap Pi Juhi Mukherjee, IAS pawhin he hun hi hmanpuiin Rajya Sabha MP Pu Ronald Sapa Tlau-in Mizoram khua zawng zawng zinga Chhiahtlang khua a “model village” atan a thlang chu an vanneihzia hrilhin a lawmpui thu a hrilh a. Model Village ni tur hian tih tur leh thawh tur tam tak a awm avangin khawtlang tanrualna a ngai dawn a, an hlawhchham anih chuan khawtlang mipui bakah anmahni thlangtu MP pawh a mualpho dawn a ni tih hria a kum 2016 ah chuan India ram puma khawdangte entawn tlak “model village” ni ngei tura a beisei thu a sawi a, hetiang tur hian khawtlang nunphung leh kalphung pawh nasa taka thlak a ngaih dawn thu leh sawrkar department hrang hrangte pawh thiam taka thawhpui a tul dawn thu te, khawtlang mipuite kutah engkim a innghah thu te a sawi a, amah ngei pawhin theihtawp chhuaha tanlak pui a intiam bawk a ni.

Vawiin SAGY zirhona hun hi Pi Maria C.T.Zuali, MCS, Director, SIRD in a kaihruai a, Dr. H.Laldinmawia’n SAGY awmzia leh nihphung bakah kalphungte zirtirna pe in mipuite atanga zawhna awm te a chhang nghal a, Pu Z.R. Thafala’n Bharat Nirman Volunteers chungchang zirtirna a pe thung a, ram tana inpumpekna thutiam mipui kalkhawmte hian an tiam ho bawk a ni.

Vawiin zirhona hun hi Serchhip District a SAGY hmalatu tur DRDA Project Director Pi Teresy Vanlalhruaii, MCS leh a hoten an telpui a, SAGY hi hun bithliah nei a a tahtawla kalpui tur anih avangin uluk tak leh tha thlah miah lova tan mar reng a ngai dawn a ni.