Vawiin hian Government Chhiahtlang High School chuan an kum sawmngana (50) Golden Jubilee lawmna hun, an School ah an nei a. Pu. K. Lalthawmmawia, IAS, Director, School Education chuan khuallian niin a hmanpui a, Jubilee lungphun a hawng.

A lawmna inkhawm ah khuallian Pu K. Lalthawmmawia, IAS chuan zirna chu chhawrtlaka mihringte kan inchherna a nih avangin kan inchherna hmun ber kan schoolte hi an pawimawh em em a. School tha kan neih theih nan sawrkar pawhin theihtawp  a chhuah reng thin a ni. Chutihlai erawh chuan sawrkar tihsak vek beiseina hian min tithuanawp thin a, khawtlang leh mipuite pawh hian mawhphurhna tam tak kan nei thin a ni. Naupangtea thiamna tuh ngheh tum lemlova Result tha neih tum ringawta zirna in a kalpui theih thu sawiin; zirna in tha chuan chhawrtlak mithiam ngei chherchhuah a tum tur a ni, a ti. Lehkha chhiar taihmak a tul thu sawiin, kan hnam hmakhua chu kan thalaiten lehkha an chhiar tam lamah a innghat a. Thalai lehkha chhiar peih lo kan tam chuan he hnam hian hmabak eng tak sawi tur a neilo tihna tluk a ni, tiin zirlai leh zirtirtu kalkhawm te chu lehkha chhiar turin a chah a, kan ramah ruihhlo, HIV/AIDS a hluar tawh zia hriaa, hla taka lo inthiarfihlim san thin turin a ngen bawk.

He hunah hian Pu Lawmawma, DEO Serchhip pawhin thu sawiin Quality Education a awm theihna tura hmalakna hrang hrang te a sawi a. Chhiahtlang High School in tluang taka kum 50 a thleng thei chu lawmawm a tih thu sawiin, School hlun tak a nih theih nana tha leh tui lo seng tawhtu hrang hrangte, zirtirna hna lo thawk tawh zawng zawngte chungah lawmthu a sawi a ni.

Vawiina Golden Jubilee lawmna inkhawm hi Pi K. Zoramchhani, Headmaster & Organising Chairman in a kaihruaia,  he school a lo zir tawhte, hna lo thawk tawh te leh khawtlang hruaitute pawhin thusawina hun an hmang hlawm a ni.

Chhiahtlang High School hi Dt. 1.4.1968 ah din niin, kum 1972 ah Deficit a hlan kai a ni a, kum 1991 ah sawrkar School ah hlan kai a ni. He school atanga inzirchhuak, mi hlawhtling tak tak engemawzat an lo awm tawh a ni.

Jubilee lawmna hi naktukah pawh neih chhunzawm tur a ni ang.