Vawiin chawhnu khan Chief Minister Pu Lal Thanhawla chuan Tuirial Airfield hmuna National Cadet Corps (NCC) Academy din leh Lungleia NCC group Headquarter din chungchanga hmalakna kal mekah NCC hotute leh Revenue Department Official-te a Bungalow-ah a kawm.

Chief Minister chuan NCC Academy leh District HQ din chu thalaite tan malsawmna a nih tur thu leh, NCC chu sipai a tang duh te tan chauh nilovin, khua leh tui tha siamna atana hmanraw tha a nih bakah a tha zawnga taksa leh rilru chawmtu tha a nih thu a sawi a. Sawrkar pawhin ngaipawimawh in, tun a hmalakna kal mek pawh hi hmawr bawk a, a nih dan tura Academy chu din thuai thei turin a kaihhnawih sawrkar department hrang hrangte pawhin an zawn theuh ah hma an lak chu pawimawh a tih thu a sawi.

Nikum kum tawp lama hemi chungchanga Chief Minister hova meeting lo neih tawh in Revenue Department hotulu te, Environment, Forest & Climate Change hotulu te leh NCC enkawltu Commanding Officer-te leh a thawhpuiten Joint Inspection neih ni se tia a lo rel tawh bawhzuina chungchang report pe in, Revenue Department official-te chuan Tuirial Airfield leh a chhehvel map an siam chu an pharh a; NCC office sakna tur hmun leh NCC activities atana mamawh hmunhma leh Air Wing din a theih dan tur te sawiho a ni. Lunglei a NCC Battalion dinna tur chungchangah NCC hotu lam chuan sawrkarah Civil Staff rawihna leh an inkhuarna tur Building mamawh dante thehluh a nih tawh thu sawiin, Chief Minister chuan a hma thei ang bera bawhzui ni se ti a ni.

Chief Minister Pu Lal Thanhawla hova NCC Academy chungchanga meeting-ah hian Principal Adviser to Chief Minister Pu  R.L. Rinawma, Revenue Joint Director (Survey) Pu Rinzamlova, Surveyor-I Pu C. Lalchhuanmawia leh NCC atangin Lt. Col Clement Lalhmingthanga, Commanding Officer, 20 Mizoram NCC te an tel a ni.