Healthy Mizoram Campaign, nimina hawn tak chu vawiin khan Loch Hall, 46 Assam Rifles-ah neih chhunzawm a ni a. Mizoram Governor Lt. Gen. Nirbhay Sharma PVSM, UYSM, AVSM, VSM (Retd.) chu Khuallian niin, Brig. MS Mokha, DIG 23 Sector Assam Rifles pawh Khualzahawm a ni. 

Lt. Gen. Nirbhay Sharma chuan khawthlang lam atanga thil rawn lut te kan ngaisang in changkannaah kan ngai thin a, Yoga kan rama kum za tam tak an lo chin thin pawh tunhnaiah khawthlang miten an rawn chin thar avangin ngaihhlutna chang kan hre ve chauh a ni, a ti a. Khawtlanga thil an chin thinte chu an that dan zirchiang hmasa a, nitin nuna seng lut chauh turin a chah a ni. Governor chuan thil a thlawna kan dawn thin te hlutna chang kan hrelo tiin, Mizoram boruak nuam leh thianghlim te chu hlut thiam turin a chah a. Healthy Mizoram Campaign-a mithiamten a thlawna zirtirna an pek te pawh hlut thiam a, chhawr tangkai turin a chah bawk a ni. 

Dr. Deepak Sachdeva, Medical Yoga Centre chuan ‘Yoga for Longevity’ tih thupui hmangin presentation a pe a. He Campaign hi National AYUSH Mission Mizoram, Directorate of Health & Family Welfare Department buatsaih niin, naktuk April ni 27, 2018 hian Yoga leh Naturopathy ah te Free Clinic buatsaih a ni dawn a ni.