Vawiin nileng khan DRDA, Serchhip leh Chhiahtlang MHIP Branch tangkawp hmalakna in Chhiahtlang Community Centre-ah CSR Project for SAGY Model Village hmalakna " Workshop on Women Empowerment " neih a ni a, District Bawrhsap, District Nodal Officer on SAGY ni bawk Dr. Lalrozama, IAS chuan workshop hawnna inkhawm telpuiin thu a sawi.

District Bawrhsap chuan khawvel pum huap hmeichhiate pual bik Ni "International Women's Day" ah ngei Chhiahtlang khua a hmeichhiate dawm kanna tur programme siam ani chu thil inhmeh tak ani a ti a, hmeichhe kalkhawmte chu an thil zir tura thahnemngai tura fuih pahin duhsakna a hlan a, Rajya Sabha MP Pu Ronald Sapa Tlau-in model village a siam tur atana a thlan atanga hemi atana hmalakna chi hrang hrangah mit an la tlung rih hle ni a a hriat thu sawiin tan la chhunzawm zel turin a chah a, khaw entawn tlak leh zirchian tlak an nih theihna tura Sawrkar ruahmanna hrang hrang kalpui kawngah pawh an tawiawm chhunzawm zel a beisei thu sawiin thawhhona tha tak neih chhunzawm zel puiah a sawm bawk a, hmeichhiate chanvo leh dikna humhalhna chungchang inzirtirna hun tha an nei chu a hlut zia hria a rilru pe tura chah in Dan leh Hrai, Zirna leh Hriselna te chu hmeichhia te dawm kanna tura kil pawimawh ber ber te anih thu sawiin hetiang zirhona hun buatsaih ani chu lawmawm a tih thu a sawi bawk a ni.

Vawiin "Workshop on Women Empowerment" hi Pi Rohnuni Colney, APO, DRDA, Chhiahtlang MP (RS) Model Village Charge Officer ni bawkin kaihhruaiin, Pu C.R.Dothanga, VCP, Chhiahtlang in inlawmna thu a sawi a, Pi Lalramthlamuani, President, MHIP Chhiahtlang pawhin SAGY kaltlanga hmeichhiate hmasawnna tura ruahmanna a taka tihhlawhtlin ani mek chu lawmawm a tih thu sawiin theihtawp chhuaha hotute remruatna tawiawm an tum thu a sawi a ni.

Vawiina Women Empowerment chungchang Workshop hi hun thumah then niin, hun khatnaah "Dan hnuaia Hmeichhiate Dikna chanvo chi hrang hrang" thupuiah hmangin Pi Hmingthanpuii,Assistant Professor, Govt. Mizoram Law College in zirtirna a pe a, hun hnihna ah "Hmeichhiate leh Hriselna" chungchang zirtirna Dr. Rita Zoramthari, Medical Officer,Serchhip District Hospital hnen atanga ngaihthlak niin hun thumnaah "Hmeichhiate leh Zirna" tih hmangin Pi Lalthlamuani, Headmistress, Chawngbuangi Memorial School, Serchhip in zirtirna a pe bawk. Vawiin hmeichhiate tihchakna tura Rajya Sabha MP Model Village Chhiahtlanga Workshop neihah hian Chhiahtlang khua a hmeichhiate thahnemtak telin, zawhna leh chhanna hun bakah sawihona hun hlawk takin an hmang ho a ni.

Vawiin programme hi Corporate Social Responsibility kaltlanga General Insurance Company, Mumbai in Khawlailung MP Model Village hmasawnna project a ruahman pakhat "Women Empowerment" hnuaia hmalakna a ni a, hetiang programme hi nimin khan Lok Sabha MP Pu CL Ruala'n model village a siam tura a thlan Khawlailung Community Centre ah buatsaih a lo ni tawh bawk a ni.

Vawiin Workshop hawn inkhawmah hian Serchhip Superintendent of Police Pu Lalringdika, DRDA Project Director Pi Teresy Vanlalhruaii leh Pu Andrew H Lalremruata, DIPRO te an tel a ni.

Attachment

  • Loading attachment...