Vawiin khan Diakkawn GSA Khelmual-ah Parliamentary Secretary Pu Hmingdailova Khiangte chuan Kolasib District Sports Committee (KDSC) in District huapa infiam mite intawhkhawmna District Sports Meet an buatsaih chu a hawng.
Khuallian Pu Hmingdailova Khiangte chuan Mizoramin infiamna lamah hma a sawn dante sawiin infiamna ruhrel kan duhthusam ang te la nei lo mah ila, tunah kan neih ang angte tangkai taka kan hmana, kan tum a ruh a, kan teirei peih chuan hlawhtlinna kan nei thei ngei ang tiin he huna infiammi kalkhawmte chu a fuih a. Nikum lamah thalai mahni intihlum 98 leh drugs vanga boral thalai 27 an awm thu sawiin heng thalai nun beidawngte hi infiammi ten an veia, infiamna lamah an huikhawm theih chuan thalai nun beidawng tam tak an chhan thei a, thalai te nun kaihhruaina kawngah infiam miten mawhphurhna thui tak kan nei a ni, a ti a. Kolasib District Sports Committee in District huapa hetiang Sports Meet an buatsaih chu lawmawm leh fakawm a tih thu a sawi bawk.
Khualzahawm Kolasib DC Pu H. Lalengmawia, IAS pawhin thusawiin infiamna lam ani emaw, zirna lam a ni emaw inthunnuna, inrintawkna, tumruhna, thawhrimna leh beiseinna te hi hlawhtlinna thuruk a ni a. Infiamna ruhrel lamah kan tlin lohna leh kan pachhiatna te hi infiamna kawnga hma kan sawnna tura daltu ah ngai lova hma lam pana min nawr kaltu zawka ngai thin ula tiin infiammite chu a chah a ni.
Sports Meet hawnna inkhawm hi Dr. Zahmingthanga, President, KDSC in kaihruaiin Pu Andrew VL Auva, Secretary, KDSC hnen atangin report tawi ngaihthlak a ni. Sports Meet hawnnaah hian Sports & Youth Services Department Director Pu Zothanmawia leh Mizoram State Sports Council-a officer thenkhat te bakah Kolasib District a Head of Office te an tel kim hle a ni.
District Sports Meet-ah hian infiamna discipline 6 - football, volleyball, table tennis, wrestling, athletics leh tug of war te inelna buatsaih niin football-ah hian team 23 an chhuak a, volley ball mipa-ah team 18 leh volleyball hmeichhia-ah team 12 an chhuak bawk a ni. Heng team te hi Kolasib khawpui chhunga veng hrang hrang leh District khaw hrang hrangte an ni.
Parliamentary Secretary Pu Hmingdailova Khiangte in Sports Meet a hawn zawh hian Kolasib a Stadium sak mek chu a tlawh bawk a ni.
