Vawiin chawhma ah khan Mizoram Legislative Assembly Conference Hall ah UD&PA Department leh Former Legislators Association of Mizoram(FLAM) tangkawp chuan Smart City Mission chungchang zirchianna an buatsaih a. He hunah hian Mizoram Governor Lt Gen. Nirbhay Sharma (Retd.) leh mithiam sawmbik te hnen atangin Aizawl khawpui tana Smart City Mission chhawr tangkai a nih theih dan tur te ngaihthlak a nih bakah rawtna leh sawihona hun neih a ni.

Smart City Mission for Aizawl Seminar a thusawitu, Mizoram Governor Lt Gen. Nirbhay Sharma (Retd.) chuan Smart City Mission atana khawpui dang te inpuah chah dan anga Aizawl khawpui lo chei bawl chu a fuh ber loh thu leh Aizawl khawpui in a mamawh pawimawh zual te hriatchian hmasak a that ber zawk thu a sawi a.Khawpui chhunga insak dan kalphung mumal tawk lovin a hrin, chenna in bit lutuk, kawngpui tawt lutuk leh bawlhhlawh paih dan awmze nei tawklo te tih zia awm bakah thla 8 chhunga ruahtui tla luangral thin khawl that theih te chu Aizawl khawpui a cheng ten an mamawh hmasak nia a hriat thu a tarlang a. Governor chuan Aizawl khawpui hmasawnna tur chuan a chhunga cheng te pawh in mi tam zawk thatna ngaipawimawh in an ram leh inhmun te thlenga chan then ve te pawh an inhuam tel a ngai a ni a ti. Smart City for Aizawl chu chhungkaw bil theuh atanga a intan hmasak a pawimawh thu a sawi a. Kawlpetha leh tui renchem thiam, mahni chenna in leh a chhehvel vawnfai,vantlang thil duatthiam inzirtirna bakah Municipal Corporation kaihruaina zawm that te chu chhungkaw tin ah in tan hmasa se Aizawl tan Smart city Mission a hlawhtling thei ang a ti a. Khua leh tui ten khawtlang hmasawnna tura an tihtur an chian a pawimawh thu sawiin Sawrkar kutah engkim nghah a nih chhung chuan hlawhtlinna tak a awm thei lovang a ti.

Aizawl khawpui chhunga Mipui nawlpui himna ngaihtuah hmasak a pawimawh thu sawiin Nepal, Sikkim leh Manipura chhiatna lo thleng te khan Aizawl khawpui a cheng te ti har thar se a duhthu a tar lang a.Governor chuan, “ Lirnghing kawngah pawh hmun hlauhawm ber anga chhal hmunah kan ding a. Han en mai chuan Aizawl khawpui hi a him lo a ni tih mitin in kan hre thei ang. Smart City hmanga Aizawl khawpui cheibawl that a ni tur hi ka lawm a, ka ngaih pawimawh ber chu mipui himna a nithung. Ka ngaihdan chuan Smart City chu a him tur a ni”, ti in Smart City Mission hna thawktu tur te chu mipui himna dah hmasa ber tur in a ngen a ni.

Smart City Mission Seminar hi FLAM President Pu K.L. Rochama, Ex-MLA in a kaihruai a, College zirlai, mithiam sawmbik te leh Aizawl pa langsar ten he seminar pawimawh tak hi an chhim a ni. Pu Zorammuana, Director, UD&PA chuan Aizawl Smart City Mission & Concept sawifiah in Aizawl khawpui cheibawl that dan tura Sawrkar in ruahmanna a siam te chu milem nen a hrilhfiah a.

Aizawl Smart City concept paper a tarlan a nih dan chuan Aizawl khawpui pumpui zau zawng chu 152 square kilometers niin Kum 2011 chhiarpui atanga chhutin 1 Km bial chhungah mihring 1575 an cheng a ni. Aizawl khawpui ah hian mihring 293,416 cheng mekin heng zinga 98.36% hian ziak leh chhiar an thiam tih tarlan a ni. Aizawl khawpui tana Smart City Mission huang chhungah hian hmalakna tur thil pawimawh tak tak te a awm a awm in chung zingah chuan khawpui leh a chhunga chengte tih hmasawn nan tuithianghlim intur kham khawp chhawp chhuah, kawlphetha chatlak lo pekchhuah, Internet leh Digital connectivity tha zawk buatsaih, zirna in tihchangtlun leh mipui vantlang hriselna tur kawng hrang hrang te bakah vantlang hman tur lirthei tam zawk chhawpchhuah te pawh a tel a ni.