Vawiin khan Khawvel pum huap Hmeichhe Ni 2016 (International Women’s Day) chu Social Welfare Department Conference Hall-ah hman a ni a. Social Welfare Minister Pu P.C Lalthanliana’n a hmanpui.

Khuallian Pu P.C. Lalthanliana chuan mipa hlawhtlingte hlawhtlinna phena mi pawimawh tak chu hmeichhia an ni thin a, tu ma’n hmeichhia te hi endawngin hmusit suh se la, hmeichhia tumah inkiltawihin indahhniam hek suh se tiin, International Women’s Day pawh hi Mizoramah MHIP huaihawtin hlung taka hman ni thei se a duh thu a sawi. United Nations Organisation (UNO) chuan kum tin thupui pawimawh tak tak thlangin, chumi lam hawia inzirtirna leh hmalak dan turte chu mahni ram mamawh leh tul dan azirin ram hrang hrangte’n ruahmanna an siam thin a. Hmeichhiate dinhmun chawisan nan Village Council (VC) leh Municipal-ah hmeichhe quota siam sak an ni, a ti. He ni-ah hian hmeichhia zawng zawngte’n hmeichhia an nihna lama dinhmun sang zawk neih tumna lam aia mi dangte tana malsawmna an nih theihna tur lamah inpekna thar nei thei se a duh thu a sawi bawk.

Minister chuan kumin Thupui atan “Intluk tlanna khawvel – kum 2030-ah: Hmeichhia leh Mipa intluk tlan nan pen khat dang leh” (Planet 50-50 by 2030: Step It Up for Gender Equality) hman a ni a, kum 2030-ah chuan mipa leh hmeichhia inthliar hranna awm tawh lova intluk tlang deuhva kal tawh turin Sawrkarin theihtawp a chhuah mek a, tunah hian Universal Women Helpline pawh a inpeih thawkhat tawh bakah, One Stop Center for Women pawh rei lo teah din theih tura beisei a ni bawk, a ti.

He hunah hian MHIP Vice President Dr Thanpuii pawhin thu sawiin an hmalakna hrang hrang a tarlang a. Domestic Incidence Report (DIR) court-a thehluh tawh zat chu 45 niin 42 chu thuremna hmuh tawh a nih a, maintenance claim chungchangah case 55, pawngsual case 8, Domestic Violence case 130 leh Women cell-ah leh police station-ah case an refer chu 73 a nih tawh thu a tarlang a, sawrkarin Mizo innei, inthen leh rokhawm chungchanga dan The Mizoram Marriage, Divorce and Inheritance of Property Act 2014 a siam chu lawmawm a tih thu a sawi nghal bawk a ni.

Inkhawm hi Social Welfare Joint Secretary Pi K. Vanlalrawni’n a kaihruaia a, Assistant Director Pi Chuauzikpuii’n thupui hawnna hun a nei a, Mizoram Presbyterian Kohhran Hmeichhe Inkhawmpui Lian Chairman Pi Rinchawii’n Pathian hnenah inhlanna hun a hmang bawk. Programme hi Social Welfare Director Pi Vanlaldini’n lawmthu sawiin a khar a ni.