Vawiin chawhma dar 11: 30 khan chhiatna lo thlen thuta chetlak dan tur ‘Mock exercise on Earthquake’ chu Serchhip khawpui hmun hrang hrang ah a taka neih a ni.
National Disaster Management Authority, State Disaster Management Authority leh District Disaster Management Authority te tangkawpin an buatsaih Mega Mock Drill hi Chawhma dar 11:30 ah Serchhip chhim lam 10 kms-a hla Dawngzawl ram leihnuai 30 kms-a thukah lirnghing Magnitude 7-a naa sawi anga lantir niin, Serchhip khawpui chhung hmun hrang hrang pali: Serchhip Bazar, Serchhip AOC veng, Govt. Higher Secondary School leh DC Office ah te chhiatna thleng anga changin; Serchhip khawpui hmun 3 ah Road Block siam a ni a, mi 50 thi ang leh, mi 200 chuang hliam tuar anga lantir an ni. District Disaster Reponse Force te, District Rescue Team te, National Disaster Response Force te leh, khuarel chhiatna lo thleng thuta inring tura ruahman, Medical Team te, Ambulance Service, Police, Fire Services te leh Tlawmngai pawl atanga he hna thawk tura ruahman ten a tak ang thei berin an tih tur theuhte tha takin an hlen chhuak a ni.
Chawhnu lamah DC Conference Hall-ah Mock Drill neih zawh tak thlirletna, Bawrhsap Dr Lalrozama, DDMA Chairman ni bawk kaihhruaina in neih nghal a ni a, chanvo hrang hrang neitute thiltih dan Observer atana ruat ten report an pe a, thil tih diklo leh fello awmte leh ruahmanna tharte ngaihtuahin hun an hmang zui a ni.
