Mizoram sawrkar hnuaia Department hrang hranga hna lak chungchang ngaituahtu tur Committee chuan vawiin khan Chief Secretary office ah an rawtna ‘Recommendation of the Committee Constituted to Assess the Necessity for Filling up of Posts under Direct Recruitment Quota’ chu Chief Secretary Pu Lalmalsawma hnenah an hlan.

Department hrang hrangah hun engemaw chen chhung direct recruitment quota-a hna lak mumal a awm tawh loh avangin sawrkar department tam takin harsatna an tawk nasa hle a. Direct recruitment quota-a hna ruak awmte zirchianga a tul zual hnawhkhah dan ngaihtuah turin Chief Secretary chuan March 23, 2016 khan Committee a din a. Pi Renu Sharma IAS, Principal Secretary, DP&AR, GAD leh Home changtu chu Chairperson niin Agriculture leh Rural Develoment Secretary Pu Lalhmingthanga leh I&PR Secretary Pu B.Lalthanliana te member an ni a, DP&AR Secretary Pi Ramdinliani chu Member Secretary a ni. Committee hian Pu HL Dingliana, Analyst-cum-Under Secretary chu Co-opted Member atan an ruat bawk.

Direct recruitment quota-a hnaruak hnawhkhah chungchang ngaituahin he Committee hian meeting vawi 7 an nei a. Committee in a koh angin Department 42 in an post ruak dinhmun an thehlut a. Heng Department te hi a mal mala kovin 18.07.2016 leh 22.07.2016 inkar khan an hnaruakte hnawhkhah an mamawh dan sawipuina hun (consultation meeting) a neihpui leh a ni. He Committee hian ngun taka zirchianna a neih hnuah Department hrang hrang 34 hnuaia post mamawh tul ziah (priority) engemawzat hnawhkhah turin rawtna a thehlut ta a ni.