Chhiatrupna lo thlen thula chhanchhuah hna thawktute hriat tur pawimawh inzirtirna vawiin khan Champhai District Disaster & Rehabilitation Branch chuan VC leh YMA hruaitute tan workshop a buatsaih.

"Workshop/ Seminar on Disaster Risk Reduction", Govt. Champhai College Seminar Hall-a buatsaih hi Champhai DC Pu Vanlalngaihsaka chuan sawihawnna neiin, khuarel chhiatna hi mihringin kan dan theihloh thu leh, inven erawh kan tih ve theih anih thu a sawi a. Chuvang chuan vawiin a training kal te chu ngaithlatu mai ni lova, mite tanpui ngei thei tur khawpa thiamna an chhar chhuah theih nan hun hlawkthlak tak hmang turin a sawm a ni.

He huna khuallian Pu Lalnunmawia, Principal, Govt. Champhai College chuan chhiatna a lo thlen a bawihsawm dan inzirtir chu thil tha leh tangkai tak a nih thu leh, chumi atan programme siam ani chu lawmawm a tih thu a sawi a. Mi tam zawkah chuan eng emaw hlekah chiai a awl thin avangin, tu tan pawh chhiatna chungchanga inralrin dan leh chatlak dan turah hian training hi a pawimawh a ni, a ti a.

Vawiina kalkhawmte chuan mahni mai hriat bakah midang hnenah zirtirtu leh hrilhhretu nih tum theuh turin a sawm a. An hun hma lama an thil lo tawn tawh te sawitlang a, mithiamte zirtirna nen inmil zawka hnathawh dan an hriat phah a duhsak thu a sawi a ni.

Workshop-ah hian Pu Lalngilneia Colney, DSYO chu resource person niin, chhiatna lo thlen huna chhanchhuahna hnathawktute hriattur hrang hrang a sawifiah a. Chhanchhuah hnathawktu chuan chhiatna chu eng vang pawh ni se, a mi chhanchhuah turte chu mahni thisen zawmpui anga enin, lainatna leh hmangaihna telin chhanchhuah hna a thawh hian damlo tan a hlu zual a ni, a ti.

Vawiin hun hi Pu Victor Lalawmpuia, ASO leh District DM&R Nodal Officer chuan kaihhruaiin, Pu PC Zonunthara, District Coordinator, DM&R chuan thu a sawi bawk a. SDRF Khawzawl atangin Rescuer-te hriattur entirna (Demonstration) neiin, mipuite atanga zawhna leh sawi duh zawngte sawihona hun hman a ni bawk.