Vawiin July ni 23, 2019 chawhma khan Directorate of Hospital & Medical Education Recreation Room-ah Chhiatrupna thleng thei laka invenna leh inzirtirna hun, Table-top and Mock Drill for Disaster Management neih a ni.

He Table Top & Mock Drill hun hi session hniha then niin Dr.T.Lalhmangaihi, Director DHME chuan Chairperson niin a ho va. Dr. Robert L.Khawlhring, State Nodal Officer, Mental Health (i/c Disaster Management) in a kaihruai a ni.

First session-ah hian Dr. T.Lalhmangihi, Director, IIME chuan kalkhawmte lawmna thu sawiin, chhiatna hi englai pawha thleng thut thei a nih avanga inralrin reng a ngaih thu leh chutiang hun a Io thlen thulhah pawh kan chiai lohna tur atana inbuatsaihna Mock Drill siam a ni hi a lawmawm hle a ni, a ti. Hemi hnu hian DHME chhunga Health Programme hrang hranga Offi­cer ten anmahni programme kalphung theuhte sawifiahin an hmalak tawhna leh hmachhawp hrang hrangte sawina hun an hmang bawk a ni.

Disaster Management & Rehabilitation atanga Resource Person Pu Zothansanga Hmar leh Pi Zoenmawii te hnen atangin chhiatna chi hrang hrang lo thleng thei laka inven dan leh ruahmanna lo siam lawk dante, mawhphurhna chanvo hrang hrang inbel dan leh chung thilte a hun a lo thlen a a nihna ang taka hman dante powerpoint presentation hmangin thlir leh ngaihthlak ho a ni a. Resource person Pu Zothansanga chuan, “Chhiatna lian tham a lo thlen reng rengin mawh latu tur leh a tul anga thupek leh tih tur bakah dan siamte lekkawha thupetu kan awm a ngai thin a. Hemi kawngah hian Mizote hian zirtur kan ngah hle niin a lang. Chet latu tur te, ruahmanna siamtu leh mawhphur tur sawrkarin a ruatte hi an thu kan ngaihchan thiam a ngai a. Tawng bawh rum rum ringawt hian tanpuina leh chhanchhuahna hna a ti khaihlak thin a ni. Chuvangin hemi kawngah hian Mizo mipuite kan harh a hun hle a ni” a ti.

Session hnihna-ah hian Disaster Management atanga Resource person te kaihhruaina hnuaiah DHME Staff te chu Group 4-ah inthen darhin Mock Drill hi practical-in an zirho leh bawk a ni.