Kolasib District-ah chhiatrupna a thlen huna chetlak dan tur zirna hun vawiin khan DC Conference Hall, Kolasib-ah District a sorkar official te leh NGO hrang hrang ten an nei.

Dr. Arun T. Deputy Commissioner chuan he hun hi hawngin, Disaster Management & Rehabilitaion chungchanga District chhunga hmalakna hrang hrang te a tarlang a. Disaster bik atana hman tur lirthei duan te, a thlawna biak theihna 1077 chungchangte leh khaw chinchang leh inralrinna tur SMS hmanga inhrilhriatna YMA, VC leh District Official te neih a nih thu a tarlang a. District Bawrhsap chuan chhiatrupna thlen hun tur hi hriat tak tak theih nilo mahse lo inrinlawkna leh lo in ruahmanna hian chiai lova hmala thei turin min lo buatsaih lawk a ni a ti.

Vawiin training-ah hian Incident Response System hnuaia mawhphurtu hrang hrang te chanvo insem dan leh an tihtur te sawi a ni a. Khawtlang hruaitute tihtur leh mawhphurhna te bakah National Disaster Response Force (NDRF) chungchang te tarlan a ni.

Training-ah hian Director, Disaster Management & Rehabilitation Department, NDRF leh SDRF te pawh an tel a ni. Naktuk hian Kolasib khaw chhung hmun hrang hrangah mega mock drill neih a ni dawn a ni.